Filioque
|
Quest articol chì l'è scrivud in lombard, con la Noeuva Ortografia Lombarda |
Filioque, che in latin el voeul dì e del fioeul, a l'è l'espression de la dotrina de la Gesa catolega che el Spirit Sant el gh'ha origin (procession in del lenguagg teologegh) insema del Pader e del Fioeul, roba che in latin a l'è esprimuda anca con qui ex Patre per Filium procedit (che 'l vegn del Pader per mez del Fioeul). Quella dotrina chi la gh'era minga in del simbol nicenee-costantinopolitan ma l'è stada mituda, a partì del secol quell de ses, de varie gese ocidentai, fina che in tra el 800 e l'ann milla l'è rivad a Roma e l'è stad doperad anca di Papa, e in del 1014 el Papa Benedet VII l'ha mitud per la prima voeulta in d'una messa papal.
Quella roba chi l'ha menad al Gran Scisma del 1054 che l'ha spartid la gesa catolega de quella ortodossa, desgià che i orientai vedeven in del Filioque vun di error pussee gram, o propi el pussee gram, di latin, comè sostegnud del patriarca Michel Cerulari. Al dì d'incoeu, la Gesa latina la met denter al so cred el Filioque in tucc i cas che l'è minga did in lengua grega, e i gese catoleghe orientai de solet el doperen no. Anca in la pupart di gese vegnude foeura de la Reforma protestanta el se dis, e la Gesa anglicana el considera 'me part del so Cred, anca se con la possibilità de dìll no se se pensa che l'è giust a nivell ecumenegh. I vetero-catolegh, in del 1875, hann scernud la posizzion ortodossa che el Spirit Sant el vegn domà del Pader.
In tra la fin del secol quell de vint e 'l principi de quell de vintun, se pensa che el Filioque l'è semper men un problema in la comenion in tra gese: in del 1995 el Pontifici Consili per l'unità di cristian l'ha dad foeura un ducument in sui diferenze de la tradizzion grega e latina in su la procession del Spirit Sant, che l'è stad rezevud ben di ortodoss, e 'l s'è did che 'me gh'è di gese latine che 'l reciten tant 'me i ortodoss e, vist che la Gesa catolega la permet de recitàll senza Filioque, se 'l se podaria fà istess. De part ortodossa, el Sergej Nikolaevič Bulgakov l'haveva did che 'l Filioque a l'è no un dogma e nanca un'eresia, ma un'opinion teologega che se po respetà, ma gh'è anca di vos assee contrarie, per esempi el filosof e teolegh Vladimir Nikolaevič Losskij el sostegn che l'è 'n eresia e che l'è l'unega gran diferenza in tra la Gesa ocidental e quella oriental, con tute i alter che inn vegnude dopo.
Riferiment Modifega
Alter proget Modifega
Wikimedia Commons el gh'ha dent imagin o alter archivi su Filioque
