Francesc II Sforza
|
Quell articol qì l'è scrivud in Lombard, cond l'ortografia Scriver Lombard. |
Ol Francesc II Sforza (4 fevrer 1495 - 2 november 1535) l'è stait Duca de Milan del 1521 fin a la so mort. L'è stait l'ultem member de la dinastia Sforza a governar Milan.
L'era ol segond s'ciet del Lodovig Sforza e de la Beatrix d'Este. Quand qe ol Lodovig l'è stait descaçad de Milan ind ol cors dei guerre italiane, al s'è portad dree ol Francesc a la cort de l'Imperador Massimilian I, qe l'hiva sposad la Bianca Maria Sforza, jermana del Francesc. Qé qest ultem l'è stait inviad a la carriera eclesiastega; intratant ol so pader l'è stait imprexonad del Luis XII de França e l'è mort ind el 1508.
Quand qe ol Carl V l'ha reconquistad Milan ai frances ind ol 1521, ol Francesc l'è stait nominad duca,[1] l'ultem de la fameia a portar ol titol. Ol so domini al se limitava però ai territore milanes ocupads de l'armanda spagnœla.[2]
Tornad ind ol so stat, provad de vint agn de guerra, l'ha promœvid una ripresa culturala e economega. L'ha combatid ind la bataia de la Bicoca de la banda de l'imperador, ind ol 1522. Quatr agn dop l'ha cambiad front, e al s'è jontad a la liga de Cognac, insema a'l Francesc I de França, a'l papa Clement VII e a la republega de Fiorenza, e l'ha subid un assede ind ol Castell Sforzesc.
Ind ol 4 maj del 1534 l'ha sposad la nevoda del Carl V, Cristina de Danimarca, fiœla del Cristian II de Danimarca e de Isabella de Borgogna. Al g'è miga rivad a far un ered, e a la so mort ind ol 1535 ol so mez-fradell, Joann Paol, l'ha reclamad ol Ducad fin a la so mort misteriosa. Ol ducad de Milan l'è tornad insé ind i man de l'imperador Carl V, qe po al l'ha dait a'l so s'ciet Filip II.
Riferiments Modifega
Bibliografia Modifega
- (EN) Michael Mallett and Christine Shaw, The Italian Wars:1494-1559, Pearson Education Limited, 2012.
- (EN) Charles Oman. A History of the Art of War in the Sixteenth Century. London: Methuen & Co., 1937.
- (DE) Ernst Schulin. Kaiser Karl V: Geschichte eines übergroßen Wirkungsbereiches. Stuttgart: Kohlhammer Verlag, 1999.
- (IT) Francesco II Sforza, duca di Milano, Dizionario Biografico degli Italiani - Volume 50, 1998.