Geroeula (Casee)
|
Quest articol chì l'è scrivud in lombard, con la Noeuva Ortografia Lombarda |
Geroeula (parnonzia local: [dʒə'røːlə]; italian: Gerola) l'è una frazzion del comun paves de Casee, in de l'Oltrepò, che l'è stada un comun independent fina al 1853.
El paes el se troeuva a nord del centro comunal, arent al Cornal, a la Scrivia (in del pont indè che la se buta dent al Pò) e al confin cont el Piemont.
Storia
ModifegaTirad a man in di ducument sgiamò in del secol quell de dodes: in del 1250 l'è tirad a man in del cadaster di comun tassad cont el nom de Glarea con Mezana e in del 1452 l'è dent al Statuta stratarum 'me comun de l'Oltrapò. In del secol quell de quindes i so feudatari eren quei de la fameja Curte di Guazzora, che el Felip Maria Vescont ghe dà el dirit de votà el Podestà in del 1412: du ann adree i cinch procurador de la comunità ghe giuren fedeltà al Duca de Milan.
In del 1456 ghe domanden al Duca Franzesch Sforza de pagà no i tasse per i gran inondazzion che i hann colpid, e lu i esenta per trii agn. In del 1491 el Lodovigh Sforza ghe la infeuda a la Cecilia Gallerani che, in del 1525 ghe 'l darà al senator Giovann Steven Castion.
In del 1723 ghe viveven in 1258 e la gh'haveva un sindegh e un pro-consol. La desmet de vesser sota Milan in del 1743 cont el tratad de Worms, e la passa in del Regn de Sardegna. Restad comun sota el Napoleon, el sarà un decret del Vitori Emanuell del 1853 a tacàll a Casee.