Giovann Maria Vescont

Lombard Quest articol chì l'è scrivud in lombard, con la Noeuva Ortografia Lombarda

El Giovann Maria Vescont (Biaa, 7 de setember 1388 - Milan, 16 de masg 1412) a l'è stad el segond Duca de Milan.

Litrat del Vescont

BiografiaModifega

Fioeul primogenit del Gian Galeazz Vescont e de la Caterina Vesconta, a la mort in del 1402 del Gian Galeazz a Meregnan el va in sul trono, cont i giurament fad el 14 dicember al Brovet Vegg.

Domà de 14 agn, el ciapa in eredità tut el Ducad de Milan e anca di alter cità compagn de Bologna e de la roca borromea de Angera, ma el pader l'ha miss sota la regenza de la mader Caterina, jutada del prim secretari Franzesch Barbavara, fina ai 20 agn.

La Caterina l'ha lavorad per fermà i front vert cont el Stat Pontifizzi, la Republega de Fiorenza e Padoa, ma Roma la scerniss istess de deciarà guerra a Milan.

In del 1403 di politegh de la cità proeuven a fà un [[colp de Stat[[, invidios del sucess del Barbavara e timoros de la regenza de la Caterina: se unissen intorna a l'Antoni Vescont e fann tornà in la cità el Francesch Vescont, casciad via del Gian Galeazz de Milan. El Francesch Vescont el proeuva a cercà un acord cont el noeuv Duca ma intant el fomenta la ribelion. Vun di consilier che 'l gh'aveva de tratà l'è stad mazzad e donca l'è tacada una guerra civil in tra i guelf e i ghibellit, che la regenta l'è bona de tegnì sota control in di prim dì ma poeu s'ciopen di sconter pussee fort.

'Sti rebelot menen al perd de Bologna e del so contad, del Veneto viscontee, del Monferad e de Vercej.

El 17 de otober 1404 la Caterina la moeur, se pensa de pest, e i rebelot van inanz anca in tra i fioeui de Bernabò Viscont, che voreven anca lor di domini.

A menà a la fin di rebelot l'è el Jacom del Verme, convint a tornà al servizzi de Milan, che 'l entra in la cità in del 1407, ma la pas la dura domà fina al 1409, quand che la s'ciopa una guerra, fornida in del 1410 cont el nomenà del Facin Can 'me governator.

Poch dopo, però, el Can el gh'ha un atach de gota mortal e di congiurad, ligad ai ered del Bernabò, deciden de mazzà el Duca cont una cortelada in del coo denanz a la Gesa de San Gotard in Cort.

El corp del Duca l'è menad in Dom, senza onor, foeura che per un cest de fior de 'na prostituta.

El morebond Can l'ordena ai so de giuràgh fedeltà al Filip Maria Vescont, fradel del Duca apena mazzad e so sucessor e 'l promet de maridàss con la miee del Can, la Beatris Lascaris de Tenda, dopo de la soa mort.

Alter progetModifega

RiferimentModifega