Giuseppe Gianella
|
Quest articol chì l'è scrivud in lombard, con la Noeuva Ortografia Lombarda |
El Giuseppe Gianella (Isep Gianella in lombard, nom complet Giuseppe Andrea Francesco Saverio Giovanni Gianella; Milan, 6 de luj 1834 - Bagg, 18 de sgiugn 1873) a l'è stad un politegh italian, prim sindegh de Bagg sota del Regn d'Italia.
Biografia
Modifega_-_Via_Giuseppe_Gianella_-_anni_1950.jpg)
Fioeul del curt matrimoni, fad in del 1832, in tra l'Isep, imprenditor in del setor del coton e poeu adet di aque e strade, a l'epoca de 52 agn, e la Matilde Spech, de 18 agn e de nobel familia austriega, l'éra member de 'na familia originaria de la vall de Bregn, in Isvizzera, ma voramai con radis a Milan de longh temp.
Nassud senza el bobà, mort un quaj dì prima, al Palazz de Cort e a la presenza del nono Andrea Spech, l'hann batezad el midem dì a la Gesa del San Gotard cont el nom del pader.
El 15 de luj l'Imperial Regio Tribunal ghe da la tutella al nono materno, che 'l gh'ha de educàll fina a la magior età. I raport con la familia del pader se perden prest, menter quei cont el padregn el deventa mai ben strecc. In del 1839 l'Imperator Ferdinand I ghe dà la nobiltà.
El taca a studià lesg, ma el praticarà mai, desgià che el scerniss de retiràss a la Cassina Meriggia, ciapàda in eredità de la nona, per curà i so afar e dedicàss ai cavaj, che ghe piaseven propi tant.
In del 1860 el deventa sindegh de Bagg, roeul che 'l tegn fina a la soa mort. Poch prima de morì el fa testament e 'l lassa squasi tusscoss a la Congregazzion de Carità de Milan, foeura che per un quajcoss per quei che gh'è stad vesin, compagn del so barba Francesco Spech, e la quota legitima a la mader. Cont i so daner a l'è stad fad el prim asili di fiolit a Bagg.
Del 1875 el Giosuè Argenti ghe fa un bust, che incoeu l'è guarnad de l'archivi storegh del Golgi-Redaelli.