Lumbard ucidental Quest articol chì l'è scrivuu in lombard, grafia milanesa.

Dopo che i Austriegh hinn staa scasciaa foeura de tutta la Lombardia, i diversi Governi locai che s'eren creaa in quei dì lì s'hinn unii in d'on Governo Provvisori de Lombardia, el dì vott de april del 1848.
El Governo, presieduu del Gabrio Casaa, el se poneva subit contra el Carlo Cattaneo, che l'era staa el vincidor di Cinch Giornad de Milan, perchè in del menter 'l Cattaneo el voreva l'indipendenza de la Lombardia in del quader de on'Italia federal, el Casaa e i sò omen pensaven a l'annession de la Lombardia al Piemont, e infatt aveven ciamaa i Piemontes a dàggh man forta cont el sò esercit. 'Sto governo a l'era inscì amis del Regn de Sardegna che anca el minister de la guerra, el scior Pompeo Litta, l'è staa sostituii quasi subit cont on piemontes, el Giacinto Provana.
Col doperà on mucc de demagogia, el governo provvisori l'ha 'bolii diversi tass e l'ha sbassaa i dazzi, col dàggh origin a ona crisi economiga.

De part militara, el comandant lombard, el general Teodoro Lechi, giamò el vintises de marz, quand i Piemontes eren rivaa a Milan, l'eva suggerii al sò comandant de imbarcà l'esercit in sui i trenu per andàggh adree al Radetzky in retirada, prima che 'l rivass a unìss cont el gross del sò esercit bloccaa in del quadrilater. El comandant piemontes però l'ha scoltaa minga el consili, col permett inscì ai Austriegh de scappà in sicurezza e de incontràss cont i rinforz de Vienna.
A bon cunt i Piemontes hinn riessii a batt i tognitt a Goit e a ciappà Peschiera sul Garda, voeuna di quatter città del quadrilater.

Intant a Milan tucc i cittadin mas'c eren ciamaa a votà per scernì se annettes al Piemont o rinvià la decision a dopo la guerra (la gh'era minga, per esempi, l'opzion de l'indipendenza). El vintinoeuv de magg gh'è staa i resultaa: 561.002 sì contra 681 nò, inscì el vintott de giugn el parlament sardagnoeu, passada la paura ch'i Lombard ciamassen el trasferiment de la capital de Turin a Milan, hann approvaa l'annession.

Ma quei robb chì hinn staa inutil, perchè l'esercit di Savoia l'è staa battuu a Custoza, el 25 de luj. A quell pont el Governo Provvisori l'ha faa sù on Comitaa de pubblica difesa cont el general Manfredo Fanti, el Pietro Maestri e 'l Francesco Restelli, ma 'sto comitaa l'ha faa quasi nanca in temp a reunìss che 'l quatter de agost i Piemontes hinn staa battuu arent a Milan e 'l sò re Carl'Albert l'ha deciduu de domandàggh on armistizzi al Radetzky.
Inscì i soldaa del Regn de Sardegna s'hinn retiraa a ovest del Tisin, el Radetzky l'è 'ntraa a Milan e l'ha desfaa el Governo Provvisori, col mettegh al sò post on Governador militar.

Vos correlaa Modifega