La Linea (carton animad)
|
Quest articol chì l'è scrivud in lombard, con la Noeuva Ortografia Lombarda |
La Linea l'è un personasg de l'Osvaldo Cavandoli, protagonista de un carton animad e de fumet. El carton animad l'è fad su de un omin che el camina longh una linea virtualment infinida e de la qual la Linea l'è part anca lee. El personasg l'incontra in del so camin tant ostacoi e despess el parla cont el disegnador
Storia
Modifega
In del 1969 el Cavandoli l'ha insubid quell personasg chì (ciamad al principi Mr. Linea) a una quai azzienda publicitaria che la fava su filmad per el Carosello de la Rai. El personasg l'è piasud a l'ingegner Emilio Lagostina, collezzionista d'art e titolar de l'omonima industria de pignate a pression, che l'ha vorsud 'me pratagonista de un quai carosell per la soa azzienda[1]. La presentazzion del personasg, al principi ciamad Agostino Lagostina (nom che l'è stad trad de part despoeu de la prima serie) l'è stada quella chì: «Chi l'è l'Agostino? Un om piscinin e viscor, cont el nas debon espressiv, con tucc i istanze e i preocupazzion de la vita moderna. Fioeu d'un lapis e d'una man.»
La vos la gh'è stada dada del Carlo Bonomi, che el gh'ha fornid una parlada onomatopeica cont acent milanes[1], associada a una musica vagament jazz curada del Franco Godi e del Corrado Tringali[1][2]. Inscì el personasg l'è vegnud protagonista de una serie de spot de publicità famos, spantegad anca in di paes forest, indove che, agn despoeu, inn stad fad su di DVD cont i so aventure.
In del 1972 La Linea l'è vegnuda una strissa a fumet che l'ha vinciud un frach de premi internazzionai. Despoeu inn stad publicad poster, calendari e prodot de merchandising. In di agn 80 La Linea a l'è protagonista de una quai strissa seral inanz del TG di 8 ore de la sera in su la red Nazzional (incoeu Rai 1) denter de l'Almanacco del giorno dopo.
La lengua de La Linea
ModifegaEl barbotà e i imprecazzion del personasg sont in d'un lenguasg che el se capiss minga, un grammelot in del qual l'è minga complicad recognosser espression in lengua lombarda. Donca l'è facil capì perchè quell non-lenguasg l'habia iutad el spantegament internazzional del personasg, che l'è stad mai dobiad. De sorapuu i color di sfond mostren i emozzion del personasg e varien despess a segonda di cas.
Home video
Modifega- La Linea - Special Edition, Medaialia Srl, Quipos, 2008, DVD. EAN 8033309014616.
Riferiment
Modifega- ↑ 1,0 1,1 1,2 La Linea del grande Osvaldo Cavandoli. URL consultad in data 31 marzo 2011. (arqiviad de l'url orijenal in data 27 agosto 2016)
- ↑ Filippo Mazzarella. «Un jazz euforico per la Linea di Cavandoli». Corriere della Sera, 30 ottobre 2008, p. 21. Vardad in data 31 marzo 2011.