Lodovico Grossi da Viadana

Quest articol chì l'è scrivud in lombard, con la Noeuva Ortografia Lombarda

Lodovico Grossi, anca Lodovico da Viadana o Lodovico Viadana (Viadana, 1564 – Gualtieri, 2 magg 1627), a l'è stad un composidor e fraa francescan talian.

Vita

El Lodovico Grossi el nass a Viadana, un borgh del Ducad de Mantova. Despoeu del so ingress in de l'orden di Menor osservant, el ciapa el nom de Ludovico da Viadana, el renonzia inscì a la deciarazzion del casad d'origen e l'indega domà el nom e la patria, coma 'l se usava fà. Forsi el studia cont el Costanz Porta, ma la gh'è gnancamò una documentazzion certa. El vegn maister de cor de la Catedrala de Mantova prima del sginer 1594. In del 1597 el se trasferiss a Roma, indova che el resta per un quai agn. El gh'ha havud poeu tant incaregh coma maister de capella: al convent de S. Luca a Cremona (1602), a la catedrala de Concordia, aproeuv Portogruaro (del 16 november 1608 in fina a avril-magg 1609) e poeu al Dom de Fano (del 1610 in fina al marz 1612). Per tri agn, del 1614 al 1617, a l'è stad responsabel del so orden religios per l'intrega provincia de Bologna che in quell temp la ciapava denter Ferrara, Mantova e Piacenza. In del 1623, per di raport grev cont i so confradei, el se sposta a Busseto, e poeu al convent de Sant Andrea a Gualtieri, arent a Parma (incoeu provincia de Resg Emilia), indova che el moeur el 2 masg del 1627.

Stil

El Viadana l'ha desvilupad el bass continov, ancaben de forme coma el "bass seguente" o "bass figurad" fudessen sgiamò doperade; l'è stad de tute i manere el prim a doperàll con regolarità, con fonzion de sostegn armonegh (o sostituzzion) di vos, in di so cognossud Cento concerti con il basso continuo, publegad a Venezzia in del 1602.

Bibliografia

• (EN) Gustave Reese, Music in the Renaissance. New York, W.W. Norton & Co., 1954. ISBN 0-393-09530-4
• (EN) Manfred Bukofzer, Music in the Baroque Era. New York, W.W. Norton & Co., 1947. ISBN 0-393-09745-5
• (EN) Voce Lodovico Grossi da Viadana in The New Grove Dictionary of Music and Musicians, vol. 20, London, 1980. ISBN 1-56159-174-2
• (IT) Augusto Petacchi, voce Lodovico Grossi da Viadana in Dizionario Biografico degli Italiani, Treccani
• (IT) Federico Mompellio, Lodovico da Viadana, musicista tra due secoli, 1967 - Leo S. Olshki editore, Firenze
• (IT) R. Paolucci, Cappella Musicale del Duomo di Fano appunti per una storia, in Note d'archivio anno III, n. 2-3, 1926