Ol monsignùr Luigi Padovese

Ol monsignùr Luigi Padovese (Milà, 31 de Mars del 1947 - Alesandrèta o Iskenderun, 3 de Zögn del 2010) l’è stacc ü vèscof lumbàrt de la Céza Catòlega.

La sò étaModifiché

Nasìt a Milà, 'n del 1965, a 18 agn, l'è 'ndài frà in del ùrden di Fràcc Minùr Capüsì e 'n del 1973 l'è dientàt prét. L'è stài profesùr de patristica a la Pontifìcia Üniersità Antonianum, per 16 agn l'è stacc ol diretùr de 'l Istitüt de Spiritüalità sèmper a la Pontifìcia Üniersità Antonianum, fò sura l'è stai profesùr invitàt a la Pontificia Üniersità Gregoriana e a la Pontificia Académia Alfonsiana, per 10 agn l'à lauràt per la Congregasiù per i Céze Orientàle e l'à facc ol consülènt per la Congregasiù di Caüse di Sàncc.

Ol 11 de Otùer del 2004 l’è dientàt èscof titolàr de Monteverde e Vicare Apostòlech de l’Anatòlia.

L’è stai copàt a cortelàde ‘l 3 de Zögn del 2010 dal Murat Altun, ol sò aütìsta e dipendènt de religiù müsülmàna che da sés agn l’ lauràa per lü.

Ol sò 'mpègnModifiché

Ol monsignùr Luigi Padovese l’éra catàt fò lü la Türchia cóme pòst de misiù, dezà che l’ gh’éra ‘n del cör de fà rinàs i cümünità cristiane ‘n Türchia ‘ndóe öna ólta, ‘nfina al 1924, i cristià i éra pròpe tàce. Monsignùr Padovese l'éra 'mpegnàt a in del ecümenìsmo e l' sircàa de troà la manéra de fà 'ndà decórde cristià e müsülmà. L' sircàa ach de fàga ciapà a la Céza Catòlega 'l riconoscimènt de la lège türca e l’se lamentàa che ach in di stacc islàmech ‘ndó che l’è permetìt ès cristià, ol Cristianésem l’è consideràt öna religiù de ‘nferiùr.

Ol perchè i l'là copàtModifiché

‘l asasì l’à dicc de ìga üt öna ispirasiù divìna, ma i polisiòcc türch che i l’ l’à casàt in galéra e pò töcc i giurnài e i televisiù del mónt i à dicc che l’èra deprès o che l’éra malàt in del có. Ach ol Papa Benèt XVI, che pròpe ‘l dé dòpo, ‘l 4 de Zögn del 2010 l’è riàt a Cipro, prim Papa a ‘ndàga, l’à dicc che l’éra mia stàcc ü copamét polìtech. Pròpe a ‘ncontrà ‘l Papa l’ gh’éra de ‘ndà 'l monsignùr Padovese ol dé dòpo ès istài copàt, coincidènsa che la làsa di döbe söl perchè i l'là copàt.

De fati segónt Asia News [1] ol Murat Altun l' sarès mai stacc deprèss e ghe sarès gnà ü certificàt a dimostràl.

Fò sura dòpo ì copàt ol Monsignùr l' sarès salìcc söl tèt e l'avrès gridàt "Ó copàt ol Gran Satana. Allah Akbar". Pò la manéra che l'è stai copàt ol Monsignùr la starès a dimostrà che l'è stai copàt per la sò féde: i l'là scortelàt 'n de la sò cà, sura de töt al cör, e pò, dòpo che l'éra riàt sö la pórta de cà per sircà ergü che ghe dès öna mà, i gh'à teàt vià la cràpa quando fòrse l'éra zamò mórt e per i 'ntegraléscc islàmech teà vià la cràpa a ü l' fà part del sacrifése ritüàl cóntra 'l mal.

I óter précc e cristià copàcc prima de lüModifiché

La ADN Kronos la regórda [2] che prìma del vèscof Luigi Padovese, sèmper in Türchìa,

  • l’è stai copàt in del 2006 ol Don Andrea Santoro a Trebisonda da ü nasiunalìsta türch che l’à copàt a cortelàde ‘ntàt che l’ vuzàa “Allah l’è grant”, ma pò alùra s’éra dicc che, a la fì de la féra, l’asasì l’éra mia apòst de có;
  • l’è stai scortelàt in del 2007 ol Don Adriano Franchini che l’à ciapàt di cortelàde ‘n de pànsa de ü zùen de 19 agn, söbet dòpo la Mèsa de la Dümìnica, ma l’gh’è riàt a salvà la pèl;
  • i è stài copàcc in de la sità de Malatya, sèmper in del 2007, trì cristià, ü de chès-ce l’éra todèsch, che i se troàa dét in d’öna tipograféa cristiàna: i è stacc prìma ligàcc e po’ i gh’à teàt la góla.