Micchetta

Quest articol chì l'è scrivuu in lombard, grafia milanesa.

La micchetta, cognussuda anca comè rosetta o, in del bergamasch, comè stellina, a l'è on tipo de pan boffaa (donca voeuj de denter) che 'l se recognoss per el tipigh stamp a stella cont "cappell" central.

Micchetta
Origen
Alter nòmm	rosetta, stellina
Pòst d'origen	Italia
Region	Lombardia
Spantegament	Milan
Dettaj
Categoria	contorno
Settor	Pan

Doperada assee per fà-sù di panin farcii, la micchetta de solet la perd la sò croccantezza dopo ona quaj ora da la cottura.

Stòria

Spantegada comè in Lombardia, spezialment a Milan, la micchetta a l'è staa el pan di operari finn dal 1700, inquand la preparazion del pan a l'era squas tutta manuala.

Inquand la Lombardia a l'è finida sotta l'Imperi Austriegh, i funzionari imperiaj s'hinn portaa dree a Milan ona quaj novitaa alimentara (che i milanes hann ciappaa e faa lor finn a che a hinn deventaa prodott de la lor tradizion), comè el famos kaisersemmel, on panitt che gh'aveva la forma de ona rosa. I resultaa a hinn staa, però, minga inscì bej perchò, a Milan, el kaisersemmel el restava minga fresch e croccant finn a la sira ma el diventava moeuj e gommos a la svelta. L'umed del clima lombard, infatt, andava tropp denter in on prodott igroscopigh comè 'l pan, a desferenzia del pussee succ clima viennes. El se doveva trà-via dal pan el móll, svoeujall, fàll deventà pussee linger, rendell "boffaa": inscì el sarïa staa croccant per pussee temp e anca pussee deligeribel. I maester panifigador milanes a hinn riussii a fà on pan inscì, creand on pan unigh e cont di caratteristigh che l'hann faa deventaa famos.

El termen "micchetta" el nass in chest period chì. Infatt, i milanes ciamaven el kaisersemmel cont el deminutiv de "micca" ossia "micchetta". La "micca" o "mica" a l'era on pan che gh'aveva on quaj spantegament in de l'Italia del nord e 'l sò nomm, in origen, el voeureva dì freguja.

In del 2007, la micchetta ha ottegnii, dal Comun de Milan, el recognossiment "De.Co." ("Denominazion Comunala"), daa dal Comun ai prodott gastronomigh tradizionaj milanes.

Prodott simil

A gh'hinn alter pann che gh'hann i ingredient e 'l process de lavorazion istess de la michetta, comè 'l “maggiolino” e la “tartarugaa”.

Curiositaa

A la micchetta a hinn ispiraa e dedicaa ona poltronna del progettista talian Gaetano Pesce e 'l grupp podistigh La Michetta, pientaa-sù in del 1971 da di prestinee milanes che gh'aveven la passion per la corsa. El grupp a l'è anmò ativ incoeu in gar amatoriaj e master de atletiga lingera.

Nòt e alter progett

Wikimedia Commons

al gh'a dent roba culegada a:

Category:Michetta

Vos ligaa

• Cusina milanesa