Lumbard ucidental Quest articol chì l'è scrivuu in lombard, grafia milanesa.

El popolism (de l'ingles populism, a soa voeulta del russ народничество, narodničestvo) a l'è l'ideja politega de ispirazion socialista che la supporta la superiorità del popol in su di élite e la esalta i sò capacità in materia de decision e de politega. Se 'l gh'ha di element de la tradizion politega solita a l'è divisibil in popolism de destra e popolism de sinistra.

El pò avègh 'n accezion positiva o neutra, per quej sistema politegh che fann ampi us di referendum per fà decid di question al popol in di limit de la legg, sia 'n accezion negativa de moviment che 'l fa no di parpoeust realistich domà per aizzà el popol.

L'è doperaa anca el termen "gentism" per parlà de 'n popolism esasperaa e che 'l gh'ha nissuna ideja politega foeura che 'l scoltà el popol, in accezion de grupp nazional indistint.

Cont el spantegàss di mezz informatich la pupart di popolista l'ha doperaa 'sti mezz per cattà sù la popolazion in manera diretta, senza i tradizionai intermediari.

Popolism per Stat Modifega

Cechia Modifega

In Cechia el popolism a l'è spantegaa de sinistra al center e a l'estrema destra e l'è tipicament sociaa a l'euroscetticism.

El partii del President Zeman Partii di Diritt Civij, socialdemocrategh, el partii centrista liberal ANO 2011 de Andrej Babiš, i moviment de estrema destra del Tomio Okamura, el partii regionalista Severočeši.cz e, in di primm agn de la Republega, la Coalizion per la Republica - Partii Republican de la Cecoslovacchia, hinn consideraa popolista.

Anca el klausism, ideja politega del president emerit Václav Klaus e del Partii Civich Democratich, el gh'ha di element popolista, sènza vessél direttament.

Italia Modifega

El primm partii italian a vèss de tendenza popolista, foeura che per el qualunquism nassuu dopo de la guerra, a l'è staa Forza Italia, soratutt in del sò pensee anti-comunism e in l'us di mezz de comunicazion del Silvio Berlusconi, ma cont el temp a l'è staa retegnuu, soratutt dòpo la refondazion, on partii istituzional.

La Liga Nord, leada del Berlusconi, l'ha semper avuu anca lee di tendenz popolista, soratutt in su la question de l'immigrazion, tendenz deventaa poeu l'ideologia del partii in la secreteria del Matteo Salvini, che l'ha doperaa el vess popolista 'me motiv de vant e l'ha ciamaa el giornal online de la Liga "Il Populista".

Anca el Moviment 5 Stell, retegnuu popolista, l'ha semper reclamaa la soa svesinanza al popol, senza però mai ciamàss esplicitament inscì.

Riferiment Modifega

Vos corelaa Modifega