Prima Giuan Capitel Quater

Quel articul chì l'è scrivüü in Lumbard, cun l'urtugrafia insübrica ünificada.

Prima Giuan

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Quater

¹Predilett, credii minga vialter tücc i spirit, ma prué i spirit se l'è de Diu, perchè tant prufèta fals hinn vegnüü föra in del mund. ²De chest vialter savii 'l Spirit de Diu: ogni spirit che 'l cunfessa che Gesü Crist l'è vegnüü in de la carna l'è de Diu, ³e ogni spirit che 'l cunfessa minga Gesü l'è no de Diu: e chest l'è chell de l'anticrist, el qual che sentii vialter che 'l ven, e adèss el gh'è già in del mund. ⁴Vialter sii de Diu, bagaj, e i avii cunvinciüü, perchè Lü che 'l gh'è in de vialter l'è püssee grand de lü che 'l gh'è in del mund. ⁵Lur hinn del mund; per via de chest lur parlen i coss del mund e 'l mund el je sculta. ⁶Nümm sèmm de Diu; chi 'l cunuss Diu el me sculta, e chi l'è no de Diu me sculta minga. De chest nümm savèmm el Spirit de la veritaa e 'l spirit de l'errur.
⁷Predilett, nümm se vörum bén vün cun l'alter, perchè 'l bén l'è de Diu, e ognidün che l'è nassüü de Diu anca 'l cunussa Diu. ⁸Chi 'l vör no bén l'ha minga cunussüü Diu, perchè Diu l'è 'l bén. ⁹De chest el bén de Diu l'è faa cunussüü in tra de nümm, che Diu l'ha mandaa 'l so bagaj ünegh al mund perchè nümm vivum per Lü. ¹⁰In de chest gh'è 'l bén: no chè nümm èmm vurüü bén Diu, ma che Lü 'l m'ha vurüü bén e l'ha mandaa 'l so fiöö cuma una prupiziaziun per i noster pecaa. ¹¹Predilett, se inscì Diu el m'ha vurüü bén, nümm devum vurèss bén vün cun l'alter. ¹²Nigün l'ha mai vedüü Diu; se nümm se vörum bén vün cun l'alter, Diu el resta in de nümm e 'l so bén l'è faa perfètt in de nümm.
¹³De chest nümm savèmm che restum in de Lü e Lü in de nümm: perchè Lü 'l n'ha daa del so Spirit. ¹⁴E nümm èmm vedüü e testimonium che 'l Pader l'ha mandaa 'l so bagaj, el Salvadur del mund. ¹⁵Chissessìa 'l cunfessa che Gesü l'è 'l Bagaj de Diu, Diu 'l resta in de lü e lü in de Diu. ¹⁶E nümm èmm savüü e credüü in del bén che Diu gh'ha in de nümm.
Diu a l'è 'l bén, e chi 'l resta in del bén, el resta in de Diu e Diu 'l resta in de lü. ¹⁷De chest l'è faa perfètt el bén in tra de nümm, perchè nümm gh'abium cunfidenza in del di del giüdizi, perchè cuma Lü l'è, inscì nümm sèmm in de chest mund. ¹⁸La pagüra la gh'è no in del bén, ma el bén perfètt el büta föra la pagüra, perchè la pagüra la gh'ha 'l castìgh, e chi 'l gh'ha pagüra l'è no faa perfètt in del bén. ¹⁹Nümm vörum bén perchè Lü 'l m'ha vurüü bén prima. ²⁰Se quajdün el dis «Mì a vöri bén Diu», e l'odia 'l so fradèll, lü l'è un busiard; degià che chi 'l vör minga bén el so fradèll che l'ha vedüü, el po minga vurè bén Diu che l'ha minga vedüü. ²¹E nümm gh'èmm chest cumandament de Lü: che chi 'l vör bén Diu el vöra bén anca 'l so fradèll.

Navigaziun

• ← Indree a Capitel Trii
• Inanz a Capitel Cinch →
• A l'indes