Prima Peder Capitel Quater

Quel articul chì l'è scrivüü in Lumbard, cun l'urtugrafia insübrica ünificada.

Prima Peder

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Quater

¹Dunca, già che Crist l'ha patii in de la carna, anca vialter armeev de l'istèss pensee: che lü che 'l pat in de la carna l'ha desmetüü del pecaa, ²per viv el témp che 'l resta in de la carna pü a i desidéri di omen ma a la vuluntaa de Diu. ³Già che el témp che l'è passaa via l'era assee per fà la vöja di naziún--quand sii naa in di spüduratézz, i desidéri, i smitt, i baldori, i baracad, e i idolatri ilegàj. ⁴Per chèst hinn surprés che currii no insèma a l'istèss ecèss de trasada spiritüala, e ve biastemien, ⁵lur che darànn resún a Lü che l'è prunt a giüdegà i viv e i mort, ⁶Già che per chèst l'è stada nunziada la bona nuèla anca a i mort, che, intanta che hinn giüdegaa in de la carna cumpagn di omen, viven in del Spirit cumpagn de Diu.
⁷E la fin de tüsscoss l'è vegnüda vesina. Dunca, gh'avii de vèss giüst e muderaa de cuu a i uraziún; ⁸suratütt, gh'avii de 'vègh un bén fort, el vün per i alter, perchè 'l bén el quata un badalücch de pecaa; ⁹gh'avii de ricev el vün vèrs i alter sénza 'l barbutà; ¹⁰cumè ognidün l'ha ricevüü un regall, serviiven el vün a i alter cumè bonn massee de la grazia variada de Diu. ¹¹Se quajdün el parla, cumè i uracuj de Diu; se quajdün el serv, cumè de la forza che Diu el furn--perchè in de tütt el sia daa gloria Diu per Gesü Crist, che l'è la gloria e la puténza in di sècul di sècul. Amen.
¹²Predilètt, gh'avii minga de vèss surprés del brüsà intra vialter quand el ven per pruàv, cumè una cossa balénga che la süced a vialter, ¹³ma in quant fii part di patimént de Crist gh'avii de vèss pièn de letizia, perchè anca in de la revelaziún de la sua gloria siuv pièn de letizia e alegrìa. ¹⁴Se sii insültaa in del nomm de Crist, sii beàtt vialter, perchè 'l Spirit de la gloria e de Diu el requia sü vialter. ¹⁵Già che nigün de vialter gh'avarìa de patì cumè assassin o lader o vün che 'l fa mal o cumè duturún; ¹⁶ma se cumè un Cristian, el gh'avarìa no de 'vègh vergogna, ma el gh'avarìa de dà gloria a Diu in de chèst nomm! ¹⁷Perchè l'è 'l témp in del qual el cumenza 'l giüdizi de la cà de Diu; e se prima de nümm, che sarà la fin de lur che übeden no al vangel de Diu?
¹⁸E «se 'l giüst l'è a malapèna salvaa,
due 'l cumparà l'impi e 'l pecadúr?
¹⁹Dunca, anca quij che paten segund la vuluntaa de Diu gh'avarìen de cunfidà i lur anemm al Creadúr fedél, in del fà del bén.

Navigaziun

• ← Indree a Capitel Trii
• Inanz a Capitel Cinch →
• A l'indes