Prima Peder Capitel Vün

Quel articul chì l'è scrivüü in Lumbard, cun l'urtugrafia insübrica ünificada.

Prima Peder

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Vün

¹ Peder, un apostul de Gesü Crist, a i furestee elètt de la dispersiún de Pont, Galazia, Capadocia, Asia, e Bitinia, ²segund la precugnussénza de Diu el Pader, in de la santifegaziún del Spirit, a übediénza e sbroff del sangh de Gesü Crist--che cressen föra de misüra a vialter grazia e pas.
³Beatt l'è 'l Diu e Pader del noster Signúr Gesü Crist, che segund la sua granda misericordia el m'ha generaa de növ a la speranza, vivend travèrs la resüreziún de Gesü Crist di mort, ⁴a una ereditaa incurutìbila, senza smagia e inalteràbila, tegnüda in di cel per vialter ⁵che hinn prutegiüü de la puténza de Diu travèrs la fed per la salvéza prunta a vèss revelaa in del témp ültim. ⁶In de chèst sii pièn de letizia, anca bén adèss d'un poch témp l'è necessari che sii faa crüziaa in di vari tentaziún, ⁷perchè la pröva de la vostra féd sia de püssee gran valúr d'or che l'è destrütt, e essend pruada per fögh, sarà truada a la lod, la gloria e l'unúr a la revelaziún de Gesü Crist. ⁸Anca bén l'avii vedüü no, el vurii bén; anca bén el vedii no, credii e sii pièn d'una letizia no disìbila e glurifegada, ⁹e ricevii la fin de la féd--la salvéza di anemm.
¹⁰Sü chèsta salvéza hann cercaa e investigaa i prufètt che hann prufetizaa sü la grazia che sia la vostra, ¹¹esaminand a qualsessìa o a qual géner de témp l'era faa savüü intra lur el Spirit de Crist, che l'ha predii i passiún de Crist e i glori despö de chèst; ¹²a quij l'era revelaa che chèst coss hann servii minga a lur medemm, ma a vialter, quij adèss hinn staa faa savüü a vialter travèrs quij che l'ha nunziaa la bona nuèla per el Spirit Sant, che l'è mandaa del cel--coss a quij desideren i angiul de sbassass e vardà.
¹³Dunca, avend cintaa i fianch de la vostra mént, essend muderaa (de bév), speree cumpletamént a la grazia che l'è purtada a vialter in de la revelaziún de Gesü Crist. ¹⁴Cumè i fiöö d'übediénza, cunfurmeev no a i desidéri de la vostra ignuranza prima, ¹⁵ma segund Lü che 'l v'ha ciamaa l'è sant, devegnii sant anca vialter medemm in ogni cumpurtamént, ¹⁶perchè l'è scrivüü: «Sii sant, perchè Mì sun sant».
¹⁷E se ciamii al Pader che 'l giüdega sénza distinziún di personn segund l'opera de ogni persona, cumpurteev per el témp del voster esili in de la pagüra, ¹⁸già che avii savüü che sii liberaa, no cun coss curutìbil, argént o or, del cumpurtamént inütil che avii tramandaa, ¹⁹ma cunt el sangh preziús de Crist, cumè un berìn senza culpa o smagia, ²⁰che l'era staa cugnussüü prima de la fundaziún del mund, e che l'è staa revelaa a la fin di témp ²¹a quij che per via de Lü creden a Diu che 'l ghe levaa di mort e 'l ghe daa gloria, perchè la vostra féd e speranza sien in de Diu.
²²Già che i voster anemm hinn staa faa nètt in de l'übediénza de la veritaa al bén de fradèll senza ipucrisìa, del cör ve vurii bén sinceramént, ²³perchè sii staa generaa de növ no de sumenza curutìbila, ma incurutìbila, travèrs la parola de Diu che la viv e la resta: ²⁴perchè:
«Ogni carna e cumè l'erba,
e tüta la sua gloria e cumè un fiur d'erba;
l'erba l'è staa secaa,
e 'l fiur l'ha burlaa giò;
²⁵ma la parola del Signúr la resta per semper».
E chèst l'è la parola che l'è staa nunziaa a vialter.

Navigaziun

• ← Indree a Giagum 5
• Inanz a Capitel Düü →
• A l'indes