Prima Tessalunices Capitel Cinch

Quel articul chì l'è scrivüü in Lumbard, cun l'urtugrafia insübrica ünificada.

Prima Tessalunices

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Cinch

¹E sü i témp e i stagiún, fradèj, gh'avii minga besogn che quajdün el ve scriva, ²già che vialter medemm savii perfetamént che el dì del Signúr el ven cumè un lader de nocc. ³Quand se'l dis: «Pas e següréza», alura a l'impruvista el ven rüìna cumè i döj del part a una dona pregna, e tabacarànn no via. ⁴Ma vialter, fradèj, sii no in del scür, che el dì el ve branca cumè un lader, ⁵già che tücc vialter sii fiöö de la lüs e fiöö del dì. Sèmm né de la nocc né del scür: ⁶dunca, durmarìum no cumè el rest ma starìum sü e sarìum muderaa. ⁷Già che lur che dormen, dormen de nocc, e lur che se ciuchen, se ciuchen de nocc; ⁸ma nümm, già che sèmm del dì, sarìum muderaa, despö che s'èmm vestii cun la curaza de la féd e del bén, e per l'elmu la speranza de la salvéza; ⁹perchè Diu 'l m'ha minga metüü per l'ira, ma per l'utegnì de la salvéza per mèzz del Signúr Gesü Crist ¹⁰che l'è mort per nümm, perchè sia che stèmm sü sia che dormum, vivum insèma cun lü.
¹¹Dunca, incuragieev el vün l'alter, e fee sü el vün l'alter, cumè già fii.
¹²Ma ve dumandum, fradèj, d'avègh riguard per quij che travajen intra vialter e hinn metüü sura de vialter in del Signúr e che ve visen ¹³e de cunsideràj grandamént in del bén per via del lur lavúr. Vivii in de pas intra vialter medemm. ¹⁴E ve racumandi, fradèj, visee i zavaj, cunsulee i timid, tegnii sald i débul, sarìuv paziént cun tücc. ¹⁵Vardee che nigün el paga indree a un alter mal per mal, ma semper cerchee 'l bén el vün a i alter e a tücc.
¹⁶Sarìuv letizia semper,
¹⁷preghee sénza 'l cessà
¹⁸Dee grazi in de tüsscoss:
perchè chèsta l'è la vuluntaa de Diu in de Crist Gesü per vialter.
¹⁹Smurzee minga el Spirit,
²⁰Desprezee minga i prufezi,
²¹e pruvee tüsscoss, tegnii sald la bona cossa,
²²tegniiv d'ogni furma de mal.
²³E 'l Diu de la pas medemm el ve faga sant cumpletamént, e 'l sia vardaa tütt el voster spirit, anema e corp, sénza culpa per la vegnüda del noster Signúr Gesü Crist. ²⁴Lü che 'l ve ciama l'è fedél, che 'l ghe farà.
²⁵Fradèj, preghee per nümm.
²⁶Salüdee tücc i fradèj cun un bas sant. ²⁷Ve scungiüri, per el Signúr, che chèsta letera la sia leta a tücc i fradèj.
²⁸La grazia del noster Signúr Gesü Crist la sia cun vialter.

Navigaziun

• ← Indree a Capitel Quater
• Inanz a Segunda Tessalunices Capitel Vün →
• A l'indes