Prima Tessalunices Capitel Quater

Quel articul chì l'è scrivüü in Lumbard, cun l'urtugrafia insübrica ünificada.

Prima Tessalunices

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Quater

¹Per el rest, fradèj, ve dumandum e esurtum in del Signúr Gesü che propi cumè avii ricevüü per nümm cumè gh'avii de caminà e piasè a Diu, cumè anca caminii, perchè bundii püssee. ²Già che savii quij cumandamént v'èmm daa travèrs el Signúr Gesü. ³Già che chèsta l'è la vuluntaa de Diu, la vostra santifegaziún: che ve tegnii del pecaa sessüal, ⁴che ognidün de vialter el sa tegnì el propi atrèzz in de santitaa e unúr, ⁵no in de passiún de desideri, cumè i naziún che cugnussen minga Diu, ⁶che trasgredii no né prufitii del voster fradèll in di afár, perchè 'l Signúr l'è un vendicadúr de tücc chèstcoss, cumè anca èmm dii prima e daa testimunianza. ⁷Già che Diu 'l v'ha minga ciamaa a l'impüritaa, ma a la santitaa. ⁸Dunca, lü che 'l despreza el despreza minga un vèss üman ma Diu che l'ha daa el sò Spirit Sant a vialter.
⁹E sül bén di fradèj, gh'avii minga besogn che quajdün v'en scriva, già che vialter medemm hinn insegnaa de Diu a vurè bén el vün l'alter, ¹⁰defàtt, anca el fii a tücc i fradèj che hinn in de tüta la Macedonia. Ma nümm ve incuragium, fradèj, a avègh ancamò püssee che assee ¹¹e gh'avarìuv ambiziún de viv quietamént, de fà i voster propi coss e de lavurà i voster man, cumè v'èmm urdinaa, ¹²perchè caminuv in d'una manéra unurèvula vèrs lur de föra e gh'àbiuv nigün besogn.
¹³Ma vörum no che siuv gnurant, fradèj, sü lur che s'hinn cucaa via, perchè siuv minga trist cumè anca 'l rest che gh'hann minga speranza. ¹⁴Già che se credum che Gesü l'è mort e s'è drizaa sü, inscì Diu el porta anca lur che s'hinn cucaa via per mèzz de Gesü cun lü.
¹⁵Defàtt, ve disum chèst sü la parola del Signúr, che nümm che vivum, che restum per la vegnüda del Signúr vegnarèmm no prima denanz a lur che s'hinn cucaa via; ¹⁶perchè 'l Signúr medemm, a un'orden, a la vus d'un arcangiul e a la trumba de Diu vegnarà giò del cél e i mort in de Crist se drizarànn sü prima, ¹⁷alura nümm che vivum, che restum, sarèmm brancaa insèma cun lur in di nivul per impatà 'l Signúr in de l'aria; e inscì sarèmm cunt el Signúr per semper. ¹⁸Dunca, incuragieev el vün l'alter cun chèst paroll.

Navigaziun

• ← Indree a Capitel Trii
• Inanz a Capitel Cinch →
• A l'indes