Primula glaucescens

Primula glaucescens
	;
Classifigazion sientífiga
Regn:	Plantae;
SubRegn:	Tracheobionta;
Division:	Magnoliophyta;
Clas:	Magnoliopsida;
Subclassa:	Dilleniidae;
Ùrden:	Ericales;
Famìa:	Primulaceae;
Sota-famìa:	Primuloideae;
Zèner:	Primula;
Spéce:	P. glaucescens;
Nomm binomial
	Primula glaucescens; Moretti, 1822

Chest artícol a l'è scricc in Lumbàrt, ortograféa orientàl unificàda.

Primula glaucescens l'è 'na spéce de piànta piötòst ràra de la famìa botànica de le Primulaceae che se tróa apéna sö le Prealpi e Alpi lombàrde e del Trentì.

Descrisiù

Fùrma Biològica: H ros - Emicriptòfite rosulàde.

Primula glaucescens

L'è 'na piànta perène, erbàcea cespitùza, condèn rizòma cürt e spès, el gambì del fiùr l'è piö lónch de le fòie e 'l pöl rià 'nfìna a 5÷12 ghèi.

Le fòie le fùrma 'na rözèta bazàl, le g'ha mìa 'l gambì o se pròpe l'è cürt cürt. Le g'ha 'na fùrma lanceolàda-spatolàda, 'ntréghe e 'ndèla part apicàl le fenés a àngol gös. De cunsistènsa coriàcea, i è sènsa nesöna pelüria e i è löstre. L'òrlo l'è cartilaginùs e apéna apéna capetàt, el pöl véser piö o méno ultàt endré.

Ensìma al gambì del fiùr se fùrma 'na bèla umbrilìna de fiùr (de sòlet dei 2 ai 5 elemèncc) bèla spèsa. I fiùr, portàcc söndèn pedùncol, i g'ha 'l càles tubulùs-campanulàt coi dintì gös, lónch compàgn del tübizì; la coròla l'è a fùrma de turtaröl, de culùr ròza che tìra al viòla e la fàuce biànca. El tübizì de la coròla l'è lónch dei 12 ai 13 mm. El fiùr l'è furmàt de 5 lòbi ale ólte capetàcc en maniéra iregolàr, bilobàcc separàcc 'nfìna a 1/3 de la longhèsa. Le bràtee i è lineàre-lanceolàde, de spès le tìra al rós e i è piö cürte dei pedùncoi.

Habitat

La crès dré a le préde ömede, geròcc calacàrei, pòscc che rèsta sóta la néf enfìna tàrde, e pò a 'n quach zòna erbùza dei 450 ai 2.400 m s.l.m.

Sistemàtica

Le popolasiù de P. glaucescens de la Al de Cadì e del Pas del Crocedòmini (Pruvìncia de Brèsa) e chèle del Rezegù e dei Córegn de Canz, le g'ha 'n càles piö cürt e 'na coròla piö pesèna; le vé recunusìde come variànt "longobarda".

Bibliugrafìa

PIGNATTI S., Flora d'Italia. Edagricole, Bologna. 1982
CONTI F., ABBATE G., ALESSANDRINI A., BLASI C., Checklist of the Italian Vascular Flora. Palombi, Roma. 2005
AESCHIMAN D., LAUBER K., MOSER D., THEURILLAT J.P., Flora alpina. Ediz. italiana: Bologna, Zanichelli. 2004
MARCONI G., Piante minacciate di estinzione in Italia. Gruppo Perdisa, Bologna. 2007