Rumàn Capitel Trii

Quel articul chì l'è scrivüü in Lumbard, cun l'urtugrafia insübrica ünificada.

Rumàn

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Trii

¹Dunca, che cossa l'è 'l vantagg del Giüdee o che cossa l'è 'l prufitt de la circuncisiún? ²Tant segund ogni manéra. Già che prima hinn fidaa cunt i uracuj de Diu. ³Già che cossa? Se quij hann minga credüü, la lur mancanza di féd la abularà la féd de Diu? ⁴Che 'l sia no! E che Diu 'l sia vér, e ogni vèss üman un busarad, cuma l'è scritt:
«Perché te siet faa giüst cunt i tò paroll,
e te purtaree la vitoria quand te see giüdegaa».
⁵E se la nostra ingiüstizia la fa vedüda la giüstizia de Diu, che cossa dirèmm? Che Diu che 'l purta sü ira l'è ingiüst? Disi cuma un vèss üman. ⁶Che 'l sia no! Degià che cuma Diu 'l giüdegarà 'l mund? ⁷Ma se la veritaa de Diu l'è püssee che 'l basta in de la mia büsìa per la sua gloria, perchè sun anca mì giüdegaa cuma pecadúr? ⁸E l'è no cuma sèmm biastemaa e cuma quij disen che nümm disum: «Gh'avarìum de fà i cativ robb, perchè végnen i bonn robb»? Di quij la cundana l'è giüsta.
⁹Dunca, che cossa? Sèmm superiúr? No del tütt: già che èmm acüsaa prima che Giüdee e tücc i Grech sien suta 'l pecaa, ¹⁰propi cuma l'è scritt:
«El gh'è nissün giüst, gnanca vün,
¹¹el gh'è no vün che 'l capp,
el gh'è no vün che 'l cerca Diu.
¹²tücc hinn giraa via, insèma hinn devegnüü inütij;
el gh'è no vün che 'l fa la gentiléza,
el gh'è no tant quant vün.
¹³La lur gula l'è una fosa dervita,
cunt i lur lenguv imbrujaven,
el gh'è tossegh di aspes suta i lur laver;
¹⁴di quij la buca l'è impiènida de malediziún e maréza,
¹⁵i lur pee hinn svèlt per spantegà 'l sangh,
¹⁶in di lur vì gh'hinn rüìna e calamitaa,
¹⁷e hann minga cugnussüü la via de la pas.
¹⁸La gh'è no la pagüra de Diu denanz di lur ögg.
¹⁹E savèmm che tant quant la lég la dis, la parla a quij che hinn in de la lég, perchè ogni buca la sia fada tasüda e tütt el mund el devégna suta giüdizi a Diu; ²⁰dunca, di laur de la lég nissün el sarà faa giüst denanz a lü, già che per mèzz de la lég l'è la cugnussénza del pecaa.
²¹Ma adèss la giüstizia de Diu l'è stada fada manifesta, avènd stada dada testimunianza de la lég e di prufètt, ²²e la giüstizia de Diu l'è per mèzz de la féd del Gesü Crist per tücc che creden. Già che la gh'è minga una diferénza, ²³già che tücc hann pecaa e manchen la gloria de Diu, ²⁴faa giüst a gratis per la sua grazia, per mèzz de la redenziún che l'è in del Crist Gesü; ²⁵che Diu l'ha metüü prima cuma un sacrifizi prupiziatori per mèzz de féd in del sò sangh, per una demustraziún de la sua giüstizia per via del lassà passà di pecaa che hinn sücess prima, ²⁶in de la tuleranza de Diu a la demustraziún de la sua giüstizia in del témp presént, perchè 'l sia giüst e 'l sia lü che 'l fa giüst el vün che 'l sia de la féd del Gesü.
²⁷Dunca, due l'è 'l vant? L'è lassaa föra. Per qual lég? Di laur? No, ma per la lég de la féd. ²⁸Già che cunsiderum che un vèss üman l'è faa giüst per féd, sénza laur de la lég. ²⁹O Diu l'è dumà di Giüdee? L'è no anca di naziún? Sì, l'è anca di naziún, ³⁰se debún Diu l'è vün che 'l farà giüst la circuncisiún de la féd e l'incircuncisiún per mèzz de la fed. ³¹Dunca, abulum la lég per mèzz de la féd? Che 'l sia no: ma stabilum la lég.

Navigaziun

• ← Indree a Capitel Düü
• Inanz a Capitel Quater →
• A l'indes