Rumàn Capitel Düü

Quel articul chì l'è scrivüü in Lumbard, cun l'urtugrafia insübrica ünificada.

Rumàn

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Düü

¹Dunca, te see sénza scüsa, o vèss üman, ognidün che 'l giüdega; già che chèll cunt el qual te giüdeghet l'alter, te cundanet té medemm, già che tì che te giüdeghet te fee i medemm robb. ²E savèmm che 'l giüdizi de Diu l'è segund la veritaa sü quij che fann taj robb. ³Ma te penset chèst, o vèss üman, che te giüdeghet quij che fann taj robb e te fee i medemm, che te scapet via del giüdizi de Diu? ⁴O te desprezet la richéza de la sua gentiléza e la tuleranza de la sua paziénza, savend no che la gentiléza de Diu te mena al pentimént? ⁵Segund la tua stinadéza e cör impenitént, te müget via per tì medemm ira per el dì d'ira e de la revelaziún del giüdizi giüst de Diu, ⁶che 'l darà dedree a ognidün segund i sò laur: ⁷menter a quij che cerchen vita etèrna per perseveranza d'un bun laur, gloria, unúr e incurütibilitaa, ⁸ma a quij che hinn de cuntésa e desübeden, e gh'hann cunfidénza in de l'ingiüstizia, ira e ràbia. ⁹Tribulaziún e afliziún sarànn sü ogni anema d'una persona che la fa 'l maa, del Giüdee prima, e del Grech; ¹⁰ma gloria, unúr e pas a ognidün che 'l fa 'l bén, al Giüdee prima, e al Grech; ¹¹già che la gh'è no distinziún di personn arént a Diu.
¹²Già che tant quant hann pecaa sénza lég, anca sarànn destrütt sénza lég, e tant quand hann pecaa cun la lég, sarànn per mèzz de la lég; ¹³già che quij che senten la lég hinn no giüst arént a Diu, ma quij che fann la lég sarànn faa giüst. ¹⁴Già che quand i naziún che gh'hann minga la lég per natüra fann i robb de la lég, chèst che gh'hann minga la lég hinn una lég per lur medemm; ¹⁵chèst fann vedüü che 'l laur de la lég l'è scritt in di lur cör, intanta che la lur cugnussénza la da testimunianza cun lur e intra el vün i alter i pensee fann acüsa cuntra lur o i defenden, ¹⁶in del dì che Diu el giüdega i robb scundüü di vèss üman segund el mè vangel per mèzz del Crist Gesü.
¹⁷E se tì te see ciamaa Giüdee e te requiet sü la lég e te se vantet in de Diu ¹⁸e te cugnusset la sua vuluntaa, e te see d'acordi di robb ecelént, insegnaa de la lég, ¹⁹te se see cunvint de vèss guìda di orb, lüs de quij che hinn in del scür, ²⁰istrütúr di stüpid, insegnant di bagaj, avendugh la furma de la cugnussénza e la veritaa in de la lég: ²¹dunca, tì che t'insegnet un alter, t'insegnet minga té medemm? Tì che te predichet de gratà no, te gratet? ²²Tì che te diset de fà minga l'adültéri, te fee l'adültéri? Tì che te detestet iduj, te sbiutet minga i témpi? ²³Tì che te se vantet in de la lég, te desprezet Diu per mèzz del trasgredì de la lég? ²⁴Già che 'l nomm de Diu l'è biastemaa intra i naziún per via de vialter, cuma l'è scritt.
²⁵Già che menter la circuncisiún la da un prufitt se te fee la lég, se te seet un trasgressúr de la lég la tua circuncisiún l'è stada devegnüda incircuncisiún. ²⁶Dunca, se l'incircuncisiún la varda i urdinanz de la lég, la sua incircuncisiún la sarà minga cunsideraa cuma circuncisiún? ²⁷E l'incircuncisiún per natüra che la cump la lég la giüdega té che te see per mèzz de la létra e circuncisiún un trasgressúr de la lég. ²⁸Già che lü che l'è Giüdee de föra né lü che l'è de föra in de la carna l'è circuncisiún, ²⁹ma lü che l'è Giüdee de denter, e la circuncisiún l'è del cör in del spirit, no in de la létra, del qual el lod l'è no di vèss üman ma de Diu.

Navigaziun

• ← Indree a Capitel Vün
• Inanz a Capitel Trii →
• A l'indes