San Simplizzian

Quest articol chì l'è scrivuu in lombard, grafia milanesa.

El Simplizzian (latin: Simplicianus; Bebraa, 320 circa - Milan, 401 circa) l'è staa l'arcivescov de Milan del 397 fina a la soa mort.
A l'è veneraa 'me sant de la Gesa Catolega. L'è regordaa el 15 de agost (per el rito roman) o el 14 de l'istess mes (per el rito ambrosian).

Tond in riliev del San Simplizzian.

Vita

L'è semper staa amis de l'Ambroeus: de fatti, quand che quell lì l'era dree a preparàss al batesem, el Simplizzian l'era el preved che ghe dava ona man. L'ha faa l'istess lavor cont el San Gustin, cont el qual l'ha tegnuu anca on contatt epistolar strecc.
L'è cognossuu per vess staa on gran catechista e convertidor.
Quand che l'Ambroeus l'è mort, l'è staa el sò sucessor, anca se 'l gh'eva ormai giamò vottant'agn. L'ha governaa apena quatter agn, e l'ha minga lassaa tanti notizzi. Se sa che l'ha combattuu per fà lassà la sede de l'imperi a Milan.
A la soa mort, l'è staa sotraa in de la basilega che incoeu l'ha ciappaa el sò nomm.

Varda anca

• Sant Ambroeus
• San Gustin
• Basilega de San Simplizzian