Sant Ustorgg
Sant Ustorgg (Sanctus Eustorgius in Latin; Ágios Eustórgios in Grech; Sant'Eustorgio in Italian; Saint Eustorge in Frances; ... - Milan, 18 settember 350) l'è staa vescov de Milan del 344 fina a la soa mort. L'è on sant de la Gesa Cattoliga, regordaa el dì de in del qual l'è mort.
Biografia
ModifegaDuranta el temp in del qual l'era vescov l'ha convocaa on fracch de sinod diocesan per combatt l'Arianesim e per fà sù di ges noeuv. Per quest l'è regordaa de alter vescov cattoligh con paroll de stima: Sant Atanas l'ha ciamaa difensor del destin, menter el Sant Ambroeus el parlava de lù 'me on confessor. El sò nomm l'è staa miss dent al Ritt ambrosian e 'l sò cult a Milan l'è testimoniaa de cinqu ges in sò onor, come l'ha regordaa el Goffred de Busser in del Liber Sanctorum Mediolani. La pussee famosa de quei ges chì l'è la Basiliga de Sant Ustorgg, arent a Porta Cicca. E l'era consideraa on sant giamò cent ann dopo che l'era mort. La soa tomba la se troeuva proppi indove l'è che la gh'è la Basiliga dedicada a lù. Gh'è success San Dionis Marian. Sant Ustorgg l'è vun di patronn de Milan.
La leggenda
ModifegaLa storia de la soa Vita, piena de leggend, la ven del XII secol. Voeuna di leggend la dis che lù l'abbia portaa a Milan i oss di re Magg de Costantinopol, cont on carr menaa de dò vaccherell e l'abbia scernii de mettei lì proppi indove el San Barnaba l'eva convertii i primm milanes (che poeu l'è semper el sitt de la Basiliga de Sant Ustorgg). I trii sarcofagh de marmor hinn staa svoiaa del Barbarossa quand che l'ha traa giò Milan in del 1164. I oss, al dì d'incoeu se troeuven a Colonia.