Scartament metrich italian

Quest articol chì l'è scrivuu in lombard, grafia milanesa.

El scartament metrich italian a l'è 'n scartament tipegh italian derivaa del scartament metrich internazional che 'l gh'ha ona distanza in tra i binari de 950 mm.

Origin

In Italia, compagn de la Franza, el scartament l'éra misuraa no del pont pussee interno del binari ma de l'ass, donca el meter italiann l'éra equivalent a 950 mm in del sistema de misura standard.

Storia

In Italia 'sto scartament l'è miss con la legg 5002 del 29 de luj 1879, che la stabiliva i mesur a l'ass de 1'000 mm e de 1'500 mm, ciovè 950 mm e 1'435 mm in del sistema standard.

De quell ann la pupart di ferrovij a scartament redutt italiann a hinn staa faa su a scartament metrich italian e la pupart di ferrovij a scartament metrich internazional che gh'è in Italia hinn staa faa su in l'Imperi Austro-Ongaregh, compagn de la ferrovia del Renon e de la ferrovia Trent-Malé-Mezzana, o per compatibilità internazionala compagn de la ferrovia Dòmm-Locarn o de la ferrovia del Bernina: 'n eccezion parziala l'è la ferrovia Genoa-Casella, fàda su in del 1929.

Con l'annession del Trentin e de Triest in del 1919 l'Italia la eredita anca on poo de lign a scartament bosniach, che hinn saraa dent di agn '20, foeura che per la ferrovia de la Val Gardena che la sara in del 1960. Di alter a hinn inveci trasformaa a scartament metrich internazional, compagn de la ferrovia de la Val de Fiemm, che la resta finna al 1960 anca lee.

Cont el colonialism italian 'sto sistema l'è esportaa: in del 1901 l'è verta la ferrovia Massaua-Asmara, in del period de la segonda guerra mondial hinn faa su di ferrovij in Libia con 'sto scartament, in tra el 1914 e 'l 1941 l'è stada in servizzi in Somalia la Ferrovia Mogadiscio-Villabruzzi.

Cont el temp i lign in Italia con 'sto scartament hinn staa saraa: la red FS a scartament redutt de la Sicilia, in pee del 1903, l'è completament sarada in del 1987 dopo de 'n period de depotenziament, menter la ferrovia Rimini-San Marin l'è sarada durant de la guerra paj dagn ricevuu.

Anca la pupart di Ferrovij de la Sardegna a hinn staa saraa, ma mai del tutt: del 2000 'na part l'è trasformada in tram, compagn de la tranvia de Sassari e de la red di tram de Cagliari.

Ona part de la ferrovia Circumetnea l'è stada poeu convertida a scartament standard e l'è deventada la metropolitana de Catania.

Esempi

Attiv incoeu

Italia

Alter Stat

Ferrovia Massaua-Asmara (domà parzialment attiva)

Saraa

Italia

Alter Stat

Riferiment

Alter progett

Wikimedia Commons el gh'ha dent imagin o alter archivi su scartament metrich italian

Vos corelaa

Scartament redutt