Segunda Timotee Capitel Vün

Quel articul chì l'è scrivüü in Lumbard, cun l'urtugrafia insübrica ünificada.

Segunda Timotee

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Vün

¹Paul, un apostul de Crist Gesü per mèzz de la vuluntaa de Diu, segund la prumèssa de la vita che l'è in del Crist Gesü, ²a Timotee, el bagaj predilètt: grazia, misericordia, pas de Diu Pader e Crist Gesü, el noster Signúr.
³Duu grazi a Diu, al qual servi fin di mè antenaa cun nèta cusciènza, cuma me regurdi de tì sénza cessà, in di mè preghér nocc e dì, ⁴desiderand vedètt, despö che me sun regurdaa de tì cun lagrimm, perchè a sia pièn de letizia, ⁵intanta che ciapi memoria de la féd sincéra in de tì, che prima l'è stada de cà in de tua nona, Lois, e in de tua mader, Eunice, e sun persuas che 'l gh'è anca in de tì. ⁶Per via de chèsta resún, a te regordi de fà brüsà de növ el regàll de Diu che l'è in de tì per mèzz de l'imponn di mè man. ⁷Già che Diu 'l m'ha minga daa un spirit de pagüra, ma de forza, de bén e de muderaziún. ⁸Dunca, te duarìet minga avègh vergogna de la testimunianza del noster Signúr né de mì, el sò presunee, ma pata tì cun mì per el vangel segund la puténza de Diu,
⁹che 'l m'ha salvaa,
e 'l m'ha ciamaa cunt una ciamada santa,
no segund i noster oper,
ma segund el sò propi pruposit e grazia,
che 'l m'è staa daa in del Crist Gesü
prima de tütt el témp,
¹⁰e che l'è faa ciar adèss
per mèzz del cumparì del noster Signúr
Crist Gesü,
che l'ha tiraa via la mort,
e che l'ha purtaa a la lüs la vita e l'imurtalitaa
per mèzz del vangel
¹¹per el qual mì sun faa predicadúr, apostul e insegnant, ¹²per via de chèsta resún anca mì pati chestcoss; ma gh'huu minga vergogna, perchè suu chèll che huu credüü, e sun persuas che lü l'è capaz de fà la vardia sül mè deposit fin a chèll dì. ¹³Che gh'abiet un esempi de paroll san che t'hee sentii de mì in de féd e de bén che hinn in del Crist Gesü; ¹⁴fee la vardia sül bun deposit per mèzz del Spirit Sant che 'l sta de cà in de nümm.
¹⁵Te see chèst, che tücc che hinn in d'Asia hann giraa via de mì, intra quij hinn Figell e Ermogene. ¹⁶Che 'l Signúr el daga misericordia a la cà de Onesifor, perchè 'l m'ha renfrescaa tant völt e l'ha minga avüü vergogna de la mia cadena, ¹⁷ma quand l'è vegnüü a Roma el m'ha cercaa diligentamént e 'l m'ha truaa; ¹⁸che 'l Signúr el ghe lassa truà misericordia del Signúr a chèll dì. E quant coss l'ha servii a Efes, te savet mèj.

Navigaziun

• ← Indree a Prima Timotee Capitel Ses
• Inanz a Capitel Düü →
• A l'indes