Prima Timotee Capitel Ses

Quel articul chì l'è scrivüü in Lumbard, cun l'urtugrafia insübrica ünificada.

Prima Timotee

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Ses

¹Tant quant hinn s'ciav suta un giuv, gh'avarìen de cunsiderà i lur propi padrún dègn de tütt unúr, perchè 'l nomm de Diu e l'insegnamént el sia minga biastemaa. ²E quij che gh'hann padrún che creden gh'avarìen de desprezàj, perchè hinn fradèj, ma pütost gh'avarìen de servìj, perchè quij che riceven el benefizi hinn credent e predilètt.
Insegna chèstcoss e incuragiaj. ³Se quajdün l'insegna un'altra roba, e vegnen no vesín a i paroll sant del noster Signúr Gesü Crist e l'insegnamént segund la pietaa, ⁴hinn sgunfiaa cunt urgöj, capen nagott, ma hinn malaa sü qués e lott vann sü paroll, di quij vegnen invidia, cuntésa, biastemì, suspètt malign, ⁵afar svöj di personn guastaa in de la mént e sfrusaa de la veritaa, de quij che cunsideren la pietaa vèss surgént de guadagn. ⁶Ma la pietaa l'è un grand surgént de guadagn cun cuntentéza:
⁷già che èmm purtaa nagott in del mund,
perchè né podum minga purtà quajcossa föra;
⁸e se gh'èmm el mangià e vestiari,
sarèmm cuntént.
⁹E quij che vören vèss sciúr burlen giò in de tentaziún e trapa e tant desidéri balord e nucìv, che fann fundà i personn in de rüìna e destrüziún. ¹⁰Già che una radis de tücc i coss cativ l'è 'l bén de danee, del qual perchè quij ghe desideren, hinn menaa via de la féd e s'hinn prucuraa tant dulúr.
¹¹Ma tì, o persona de Diu, scapa via de chèstcoss:
e persegüta la giüstizia, la pietaa, la féd,
el bén, la perseveranza, la mansuetüdin.
¹²Luta la bona lota de la féd,
branca la vita etèrna, a la qual te see staa ciamaa,
e te hee cunfessaa la bona cunfessiún denanz a tant testimon.
¹³Te cumandi denanz a Diu che 'l fa viv tüsscoss e Crist Gesü che l'ha daa testimunianza denanz a Ponzi Pilatt la bona cunfessiún, ¹⁴che te tegnet chèst cumandamént sénza smagia e ireprensibil fin a la cumparida del noster Signúr Gesü Crist, ¹⁵che 'l farà vedüü in di sò propi témp,
lü, el putént beatt e ünegh,
el rè de quij che regnen,
e 'l Signúr de quij che dominen,
¹⁶el sull che 'l gh'ha imurtalitaa,
e 'l sta de cà in d'una lüs inacessibila,
lü che nissün di vèss üman l'ha vedüü nè 'l po vedè:
al qual che 'l sia l'unúr e la forza etèrna! Amén.
¹⁷Cumanda i sciúr de chèsta etaa de vèss no urgujús, né de sperà in de l'insegüréza de la richéza ma in del Diu, che 'l me furn tüsscoss sciuramént per el gudimént, ¹⁸per fà el bén, de vèss sciúr in di bonn laur, de vèss largh e prunt a dà, ¹⁹muciand via un tesòr per sé medemm un bon fundamént per chèll che l'è a vegnì, per brancà la vita vera.
²⁰O Timotee, varda 'l deposit, girand via di discüssiún svöj e prufann e argumént de chèla che l'è ciamada falsamént la cugnussénza, ²¹la qual quij hann pruclamaa e dunca hann svirgulaa sü la féd.
Che la grazia la sia cun vialter.

Navigaziun

• ← Indree a Capitel Cinch
• Inanz a Segunda Timotee Capitel Vün →
• A l'indes