Television analogega
|
Quest articol chì l'è scrivud in lombard, con la Noeuva Ortografia Lombarda |
Per television analogega se intend una tecnologia che la trasmet i imagin e i son a travers de 'n segnal analogegh e de la soa ampieza, fas e frequenza. Fina ai prim agn 2000 tucc i trasmission de la television eren analogeghe, desgià che domà de quell period lì la compression digital l'è rivada a 'n nivell inscì bon de permeter de trasmeter mej in digital con men de banda doperada, e intorna ai agn 2010 la pupart di Pajes hann tacad a destacà el sistema analogegh.
A diferenza di sistema digitai, che resten visibel ben fina a la soeuja che la permet no de fà 'na distinzion in tra i bit, el segnal analogegh el va via man a man, de 'n imagin ciara a vuna che la se po no destingh, a passà per vari nivei de rumor.
Storia Modifega
Desvilup Modifega
I prim sistema de television analogega eren mecanegh che doperaven un disch con di bus che pirlaven a volta velocità inscì de fà un'imagen, ma gh'hann havud poch de sucess, per via del cost, de la complessità, soratut di cambere per registrà, e de la bassa luminosità del sistema, oltra che de la bassa scalabilità del sistema. Gh'è volud el desvilup del tubo catodegh per permeter un desvilup comercial de sucess per la television analogega.
I standard Modifega
Passà al digital Modifega
A partì di agn 2000, vari Pajes hann tacad a passà a la trasmission digital, inscì de sbassà la banda domandada per la trasmission de la TV e podé liberà varie frequenze per di alter servizzi.
El prim Pajes a destacà del tut la trasmission analogega a l'è stad el Lussemborgh, in del 2006, seguid in del midem ann di Pajes Bass, in del 2007 Andorra, Finlandia, Svezzia e Svizzera hann fad el passagg, in del 2008 i Fiander e la Germania, in del 2009 i stazzion a volta potenza di Stat Unid, el Canadà del Sud, l'Isola de Man, Norvegia e Danimarca, in del 2010 la Vallonia, la Spagna, el Galles, Letonia, Estonia, i Isole del Canal, San Marin, Croazzia e Slovenia, in del 2011 l'Israell, l'Austria, Monaco, Ziper, el Giapon (foeura che per i prefeture de Miyagi, Iwate, e Fukushima), Malta e Franza, in del 2012 la Cechia, el mond arab, el Taiwan, el Portogall, i prefeture giapones de Miyagi, Iwate, e Fukushima (el so passagg l'era stad mandad inanz per via di problema dovud al terramot e al desaster nuclear del 2011), la Serbia, l'Italia, el rest del Canadà, i Mauritius, l'Irlanda, la Lituania, la Slovachia, Gibilterra e la Corea del Sud, in del 2013, la Macedonia del Nord, la Polonia, la Bulgaria, l'Ongaria, l'Australia e la Noeuva Zelanda e in del 2019 el Singapore, la Malesia e la Russia.
El Regn Unid l'ha fad la soa transizzion in tra el 2007 e 'l 2012. La China l'ha programad la transizzion in tra el 2012 e 'l 2018, ma l'è stada fada in del 2021, e 'l Brasil el ponta a fàll in del 2023.
Fonzionament Modifega
El segnal Modifega
Sincronizazzion Modifega
In del sistema analogegh la sincronizazzion l'è mituda a la fin de ogni linia de scansion, inscì che 'l sistema di oscillator el resta sincronizad cont el segnal, roba che la permet de mostrà un segnal sensad in sul schermo.
Orizzontal Modifega
Se parla de sincronizazzion orizzontal per quella che la partiss i varie linie, che l'è representad de 'na scarega piscinina de energia che la representa el principi de 'na noeuva linia, e poeu el color l'è definid de 'n segnal che 'l va de 0,3 V, o ben negher, a 1 V, o ben bianch. El tipo de impuls che 'l definiss la sincronizazzion orizzontal la varia de sistema a sistema, ma l'è semper "pussee negher del negher", de solet propi a 0 V.
Vertical Modifega
La sincronizazzion vertical, inveci, la partiss i vari camp del video. In PAL e NTSC el segnal de sincronizazzion vertical el capita in l'intervall de bianch vertical, a slongà la linia de sincronizazzion orizontal per squasi tuta la linia de scansion. El gh'ha dent anca di alter segnai, per esempi per dì se 'l camp el gh'ha de vesser disegnad in di linie pari o dispari. In vari protocoi i linie che inn pussee inn stade doperade per di alter reson, per esempi per meter i sota-titoi.
Presa orizzontal e vertical Modifega
Riferiment Modifega
Alter proget Modifega
Wikimedia Commons el gh'ha dent imagin o alter archivi su Television analogega
