Tetti Giulian
El Luci Tetti Giulian (latin: Lucius Tettius Iulianus; 45 circa - dòpo el 88) a l'è staa on general e on politich roman. A l'era fradel del Cai Tetti African.
Biografia
ModifegaEl Tetti Giulian a l'è semper staa legaa aj ambient militar, vist che in del 68-69 a l'era giamò el comandant de la Legion VII Claudia. In del 70, quand che l'era pretor, el Licini Mucian l'è riessii a convincc el Senaa a podè vess present a la primma reunion e inscì l'ha toeu via l'onor al Giulian.
Vundes ann dòpo l'ha servii in de la Guardia Pretoriana, per poeu vess inviaa in Numidia. in del 83 a l'è divegnuu consul suffectus e in del 88 a l'è staa mandaa in de la Mesia de Sòtta per prevegnì invasion barbarich. In sul limes del Danubi, el Tetti Giulian el gh'ha avuu ona granda esperienza, che l'ha iuttaa a respingg on attacch di Roxolan.
Disciplinaa e impetuos, al Giulian l'imperador Domizian el gh'ha daa l'ordin de comandà ona campagna militar contra el re di Dach, el Decebal.
El Tetti Giulian, cont el doprà el castrum de Viminazi (incoeu Kostolac in Serbia, che in Romen el se dis Caştelu) a 'è riessii a rivà fina a la capidal daca, Sarmizegetusa, dòpo avè vingiuu la segonda battaglia de Tap. Ma anca se la guerra l'era dree a andà ben per i Roman, el s'è dovuu finìlla precipitosament a causa de on'invasion in sul Danubi di Quad e Marcomann. Dòpo questa pas, el Decebal l'ha poduu conservà el pròppi regn per alter quindes ann, menter del Tetti Giulian, de 'sto moment in poeu, gh'hinn minga alter notizzi.
Bibliografia
Modifega- Dion Cassi, Stòria romana, LVII, 6-10
- Svetòni, Vid di Dodes Ceser, Domizian
- Tacit, Stòri, I, 79,5; II, 85,2; IV, 39,1; 40,2