Lumbard ucidental Quest articol chì l'è scrivuu in lombard, grafia milanesa.

La Val Codera (inscì anca in Italian) l'è ona val che la se troeuva in la Provincia de Sondri, in del comun de Novaa e al confin cont el Canton Grison.

Montagn de la Val Codera

La val, situada tra la Val Bondasca e la Val Masin, l'è traversada del fiumm Codera, che 'l finiss in del Lagh de Mezzoeula.

Tra i mont che la contornen pòdom cuntà el Pizz Badil e 'l Pizz Cingol. In particolar, el Codera el nass del Pizz di Vann.

In la val hinn present vari center, tucc frazion de Novaa, trai quaj Avedè, Codera (el capploeugh de la vall) e Bresciadega. A la maggior part de quij paes chì se pò rivà domà a pee, e despess in inverna i sentee hinn impraticabil e se pò andà longh la val domà cont i elicòtter.

L'economia de la val l'è fondada sora l'allevament de caver. Per tutt quij reson chì, in la val ghe viven ormai pòcch persònn, anca se d'estaa l'è pussee popolada che in inverna perchè tanti di vegg abitant (che viven giò a Novaa) tornen sù per passà i vacanz.

La Val Codera e 'l scoutismo Modifega

In di ambient del mond scout italian (e soratutt lombard) la Val Codera la gh'ha ona granda importanza: de fatt gh'hinn staa faa ona serie de camp del grupp di Aquile Randagie, trai pòcch che hann segutaa a viv el scoutismo sòtta el fascismo, che l'aveva devedaa ògni organizzazion giovenil che la fuss minga part de l'ONB (Opera Nazionale Balilla). Duranta la Segonda Guerra Mondial, i Aquile Randagie hann faa scappà, a travers la Val Codera e de alter vall vers el Canton Grison, on grand numer de persònn perseguitaa di nazista e di fascista.

Per quest, anca al dì d'incoeu, la val Codera l'è on loeugh privilegiaa per attività scout. Vun di capp stòrich del moviment scout clandestin, el sacerdòtt milanes Andrea "Baden" Ghetti (1912-1980), l'è staa soranominaa anca el vescov de Codera.

Vos correlaa Modifega