Lumbard ucidental Quest articol chì l'è scrivuu in lombard, grafia milanesa.

El Varon milanes de la lengua de Milan o a la curta Varon milanes l'è vun di pussee antigh test de la letteradura milanesa. Quell che l'ha scrivuu l'è 'l Giovanni Capis, nassuu a Domodossola intorna al 1550, moruu dopo del 1610. El Varon l'è on poo on dizionari etimologegh di paroll milanes (pressapocch 570), che deriven, segond l'autor, del latin e del grecch. El titol el fa vegnì in ment el Varon, che l'è famos perchè l'ha scrivuu el De lingua Latina.

StoriaModifica

El Varon l'è staa stampaa la primma voeulta a Pavia coi stamp del Bartoli, ma questa primma edizion la se cognoss domà perchè l'è regordada in la segonda, fada a Milan del Giovanni Giacomo Como in del 1606. Questa edizion, reveduda de l'Ignazio Albani (de Meraa, nassuu a la finn del Cinqucent e mort intorna al 1650), la contegn anca el Prissian de Milan de la parnonzia milanesa, scritt del Giovanni Ambrogio Biffi.

Anca ben che el sia nò scritt in milanes (al contrari del Prissian), el Varon l'è importantissem per quest dialett e la sova letteradura, al pont che el Porta 'l fa el sò nomm come primm di cinqu pilaster de la letteradura milanesa (insemma a Carlo Maria Maggi, Domenico Balestrieri, Carl'Antonio Tanzi e Giuseppe Parini), in d'on famos sonett che el scomencia inscì:

 
«Varon, Magg, Balestrer, Tanz e Parin,
cinqu omenoni proppi de spallera,
gloria del lenguagg noster meneghin,
jesuss! hin mort, e inscì nol fudess vera.»

Dopo quij primm edizion, ghe n'è staa di alter: in del 1750 a Milan, per opera de Giuseppe Marelli; in del 1816 de Francesco Cherubini, in del primm di dodes tomm de la soa Collezione delle migliori opere scritte in dialetto milanese (pp. 23-47); in del 1901 de Ferdinando Fontana in la soa Antologia Meneghina (Bellinzona, Tip. Em. Colombi, pp. 63-73). L'ultima edizion l'ha fada Dante Isella (2005), che gh' ha giontaa ona lista de vos che hinn staa dopraa di autor milanes, del Bonvesin de la Riva al Delio Tessa.

Composizion del trattaaModifica

El trattaa el pò vess deviduu in d'on poo de tocch. El Varon Milanes el scomencia cont ona dedica de l'editor in italian al nobil milanes Ercol Gallaraa, scrivuda el 6 marz del 1606. Poeu gh'è noeuvv sonett dell'autor, che hinn revolt a collega poetta, a di personn polemich in di sò confront, all'Ercol Gallaraa, all'antigh orator roman Ciceron, oppur che parlen de la natura del dialett milanes. Poeu gh'è ona segonda introduzion de l'editor per la segonda edizion e on'introduzion a l'argoment del Varon.
Donca hinn presentaa circa 570 paroll milanes, cont el sò significaa in toscan, proppi come 'l succed in d'on dizionari. Alla fin dell'elench, gh'è ona spiegazion etimològica de tutt i paroll, al finn de provà la sò origin ò greca ò latinna.
A l'è donca on tentativ de conferì al dialett milanes ona dignità compagna de quella del toscan, operazion assee coraggiosa aj inizzi del 1600, period in del qual el modell vincent della letteradura de la penisula taliana a l'era el Petrarchismo bembian.

BibliografiaModifica