Vesper Sicilian
Quella di Vesper Sicilian l'è stada ona rivolta s'cioppada in de l'isola de Sicilia (che al temp a l'era sotta el domini de la fameja francesa di Angiò) in tra el 1282 e 'l 1302.
Segond la tradizion, la rivolta l'è nassuda dopo che on soldaa frances ciamaa Drouet l'aveva insultaa ona sciora siciliana sortida foeura de gesa el Lunedì de l'Angiol (31 de marz del 1282) a Palermo. El marì l'aveva coppaa el soldaa frances, e de lì l'era s'cioppada la rivolta contra i dominator frances, che in poch temp la s'è spantegada per tutta l'isola.
Per podè resist a la reazion angioina (che dominaven anca tutt el regn de Napoli), i nobei sicilian gh'hann ciamaa aiutt del re de Aragona. De lì l'è vegnuda foeura ona guerra che l'ha portaa, a la fin, a ona spartizion del vegg regn normann: la Sicilia ai aragones e Napoli ai angioitt.
In de la retorega del Resorgiment, i Vesper Sicilian hinn vun di primm segn de la nassida de la coscienza nazional italiana.
