Vittorin

Quest articol chì l'è scrivuu in lombard, grafia milanesa.

El Vittorin (latin: Marcus Piavonius Victorinus; ...-270/271) l'è staa on usurpador roman, imperador di Galli.

Biografia

L'è nassuu de ona fameja de sciori e l'è staa on soldaa de Postum, el primm general roman a vegnì imperador de l'Imperi di Galli. El gh'ha 'vuu el titol de tribunus prætorianorum in del 266-267 e consol di Galli insema a Postum in del 267-268. L'Historia Augusta la dis che l'è staa sociaa al governa con Postum in del 267.
Quand che l'è mort el March Aureli Mari, Vittorin l'è staa eleggiuu imperador de part di soldaa de Trevir: la Gallia e la Britannia hinn staa d'accordi, menter la Spagna l'è tornada con l'Imperi Roman. Duranta el sò regn l'ha sconfiggiuu la revolta de Autun, che la s'era s'cerada con l'imperador Claudi II. Dopo avèlla sediada per sett mes, l'ha saccheggiada e trada giò.

Tra el 270 e 'l 271 l'è staa coppaa de on tal ciamaa Attizian; quell chì l'era inrabii perchè 'l Vittorin el gh'eva ciollaa la miee a lù. El poder l'è staa tegnuu anmò per on poo de la mader del Vittorin, la Vittoria: lee l'ha faa vegnì el sò fioeu on dio e poeu, dopo avèggh daa ona motta de ghei, l'ha convinciuu i soldaa a scernì 'me noeuv imperador el Tetrich. L'Historia Augusta la cunta sù che 'l Vittorin el gh'aveva on fioeu che l'è staa proclamaa imperador el dì dopo de la soa mort, e che l'è staa coppaa anca lù dopo pocch temp. Ma se sa mai se dàggh a trà o nò, a l'Historia Augusta.