Wikipedia:Regole per la scancellazzion

Quest articol chì l'è scrivud in lombard, con la Noeuva Ortografia Lombarda

A l'è possibel scancellà una vos de la Wikipedia, se 'l gh'è de besogn e la comunità l'è d'acordi.

Se poden partì i scancellazzion in do categorie:

1. Scancellazzion svelta
2. Scancellazzion ordinaria

Scancellazzion svelta

La scancellazzion svelta a l'è prevista domà in di situazzion de abus ciar e patent, o vann minga ben per l'enciclopedia, per esempi:

• Proeuve (in del cas, se po mandà l'utent al Sabion)
• Bordegament
• Reclam senza nissun valor enciclopedich
• Test minga scrivud in lombard (in del cas, se 'l proget in la lengua interessada el voeul importàll, se po spetà)
• Test scrivud in dialet inventad, ortografie mìnga recognossude e compagne (in del cas, poden vesser anca salvad in sbozz per scrivei ben)
• Violazzion di dirit d'autor
• Grama violazzion de la privacy
• Pagine de lavorà, compagn de redirect fallad e sota-pagine utent, se 'l domanden lor

'Sti scancellazzion chi inn fade de 'n ministrador, anca global in cas ecezzionai, e poden vesser domandade de tucc cont el modell {{scancellà subit}} in coo a la pagina.

Scancellazzion ordinaria

A bon cunt, la scancellazzion a l'è la roba pussee dura per una pagina, a l'è donca mej doperà i avis o provà a ajutà una pagina, per esempi cont el sgiontà de informazzion o cont el marcà i problema in la ciciarada.

Se propi se pensa che una vos la gh'ha mìnga de restà in su l'enciclopedia, perché la gh'ha di gran problema, l'è minga enciclopedica o l'è de reclam, gh'è de insubì de scancellàlla: se met el modell {{scancelà}} e se stà adree a la procedura, poeu se sgionta la procedura in su la pagina apòsta.

Per dervì la procedura, besogna, quand che la se derva:

1. Havé fad la prima modifega de almen 60 dì
2. Havégh almen 100 modifeghe totai
3. havégh, in di 60 dì prima de la procedura, ma no in di 5 prima, almen quater modifeghe in del namespace principal o des in di alter namespace

El terz meder el serviss no per i utent con fonzion de servizzi.

Procedura normal

Se in set dì nissun l'è contrari a la scancellazzion o comunque a una soluzzion compagna (per esempi, trasformà la vos in d'un redirect o menàlla in su 'n alter proget), la vos la sarà scancellada o trasformada.

Procedura consensual

Se, in di set dì, un utent cont i midem requisit per dervì una cancellazzion, el dis de volé che l'è mìnga scancellada, la se derva una procedura consensual, che la dura set dì anca lee. In 'sta procedura tucc poden comentà, ma domà i utent con almen 50 modifeghe e che scriven de almen 30 dì poden dà un sò paré che 'l cunta per el consens.

Se in set dì se troeuva minga el consens, la procedura a l'è prorogada per cinch dì.

Votazzion

Se nanca con la proroga se troeuva el consens, un ministrador el derva una votazzion: perchè la votazzion la val, gh'hann de votà almen in quater, perché la vos l'è scancellada 3/5 de quei che voten gh'han de votà per scancellàlla.

Sedenò, la resta. Comunque, in del cas che ghe cala el quorum, la procedura la sarà mìnga considerada bona per i temp che se vedarann dopo.

Nullà una scancellazzion

Una scancellazzion la po vesser nullada se:

1. Quell che la insubiss el gh'ha minga i requisit che ghe voeulen
2. Valen pu i reson de la scancellazzion (per esempi: "la vos l'è tropa curta" ma un quajvun la slarga)
3. Quell che l'ha insubid la vos per la scancellazzion la retira
4. A l'è ciar e patent che la vos l'è enciclopedega (per esempi perchè la rispeta di meder scernid de la comunità)
5. A gh'è stad di azzion de gabolà del consens che se poden minga risolver

In cas che una scancellazzion l'è nullada, la vos la po vesser subit insubida ancamò per la scancellazzion.

Temp

Se una vos a l'è minga scancellada e la procedura a l'è minga nullada, la vos la podarà no vesser candidada ancamò per trii mes, a men che la gh'è una reson propi diferenta.

Istess, se una vos a l'è scancellada, la podarà vesser no scrivuda ancamò per almen trii mes, a men che la comunità la da el so consens.

Nonzià una scancellazzion

Quand che te metet una pagina in scancellazzion, te gh'heet de avisà l'autor! Te podet fàll no se:

1. A l'è un IP
2. A l'è blocad per semper
3. A l'è retirad
4. El scriv no de un frach de temp

A bon cunt, te podet anca avisà un alter utent che l'ha collaborad in manera importanta a la vos.