Apucaliss Capitel Cinch

Quel articul chì l'è scrivüü in Lumbard, cun l'urtugrafia insübrica ünificada.

Apucaliss

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Cinch

¹E huu vedüü sü de la [man] driza de lü che 'l se seta giò sül tronu un liber, scritt de denter e de föra, sigilaa cun sètt sigìj. ²E huu vedüü un fort angiul, pruclamand in d'una granda vús: «Chi [l'è] dègn de dervì 'l liber e de deslenguà i sò sigìj?» ³E nigün el pudeva, in del cél né sü la tèra né suta la tèra, dervì 'l liber né vedèll. ⁴E mì piangevi tant, perchè nigün l'era truaa dègn de dervì 'l liber né vedèll. ⁵E vün di anziann el me dis: «Piang no, varda, el leún del tribü de Giüda, la radis de David, l'ha vingiüü per dervì 'l liber e i sò sètt sigìj». ⁶E huu vedüü in del mèzz del tronu e di quater vèss vivént e in del mèzz di anziann un berìn avend staa in pee cuma mazaa, avendugh sètt corn e sètt ögg, che hinn i sètt spirit de Diu mandaa in de tüta la tèra. ⁷E l'è vegnüü e 'l [l]'ha ricevüü de la man driza de lü che 'l se seta giò sül tronu. ⁸E quand l'ha ricevüü 'l liber i quater vèss vivént e i vent quater anziann hann burlaa giò denanz al berìn, avendugh ognidün una cètra e vas d'or impienii d'incèns, che hinn i preghér di sant, ⁹e canten una növa canzún, disend:
«Te see dègn de dervì 'l liber
e de dervì i sò sigìj,
perchè te see staa mazaa e t'hee cumpraa per Diu cunt el tò sangh
d'ogni tribü e lengua e gént e naziún
¹⁰e t'i hee faa per el noster Diu un règn e sacerdott
e regnarànn sü la tèra».
¹¹E huu vedüü e huu sentii una vús de tant àngiul inturna al tronu e di quater vèss vivént e di anziann, e 'l nümer de lur l'era miriad de miriad e mila de mila ¹²disend in d'una granda vús:
«El berìn che [l'è] mazaa l'è dègn de ricév
la puténza e richéza e saviéza e forza
e unúr e gloria e grazi». ¹³E ogni creadüra che l'è in del cél e sü la tèra e suta la tèra e in del mar e tüsscoss in de lur huu sentii, disend: «A lü che 'l se seta giò sül tronu e al berìn
la benediziún e l'unúr e la gloria e la forza
in di secul di secul».
¹⁴E i quater vèss vivént diseven: «Amén». E i anziann hann burlaa giò e hann aduraa.

Navigaziun

• ← Indree a Capitel Quater
• Inanz a Capitel Ses →
• A l'indes