Apucaliss Capitel Quater
|
|
Quel articul chì l'è scrivüü in Lumbard, cun l'urtugrafia insübrica ünificada. |
Apucaliss
ModifegaLa Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.
Capitel Quater
Modifega1Dopu de chèstcoss, huu vedüü, e varda, una porta avèrta in del cél, e la vús prima che huu sentii cuma una tromba parland cun mì, disend: «Vegn sü scià e te faruu vedè[1] [i coss] che deven süced dopu de chèstcoss». 2Sübit sun devegnüü in de spirit e varda, un tronu l'era mèss in del cél e sül tronu [el gh'era vün] setaa giò, 3e lü che 'l s'era setaa giò [l'era] in de céra cumpagn d'una preja [de] diaspru e [de] sardi, e inturna al tronu ['l gh'era] un arch in cél, in de céra cumpagn de smeraldu. 4E inturna al tronu [gh'eren] vent quater troni, e sü i troni [gh'eren] vent quater anziann[2] setaa giò vestii cun bianch mantèj, e sü i lur crapp [gh'eren] curonn d'or. 5E del tronu vegnen föra fambròs e vús[3] e trun, e denanz al tronu [gh']hinn brüsaa sètt lümm de fögh, che hinn i sètt spirit de Diu, 6e denanz al tronu cuma un mar de véder, cumpagn de cristall.
E in del mèzz del tronu e inturna al tronu [gh'eren] quater vèss vivént[4], pièn de ögg denanz e dedree. 7E 'l primm vèss vivént [l'era] cumpagn d'un leún, e 'l segund vèss vivént [l'era] cumpagn d'un vedèll, e 'l tèrz vèss vivént avendugh la fàcia cuma un omm, e 'l quart vèss vivént [l'era] cumpagn d'un'àquila vulanta. 8E i quater vèss vivént, ognidün de lur avendugh ses al, inturna e denter hinn pièn de ögg, e gh'hann minga requià[5], dì e nocc disend:
«Sant, sant, sant,
[l'è] 'l Signúr Diu l'Ogni Putént,
che l'era e che l'è e che l'è dree a vegnì!».
9E quand i vèss vivént dann gloria e unúr e grazi a lü che 'l se seta giò sül tronu che 'l viv in di secul di secul, 10i vént quater anziann[6] burlen giò denanz a lü che 'l se seta giò sül tronu e s'ingenugien a lü che 'l viv in di secul di secul e büten i lur curonn denanz al tronu, disend,
«Te see dègn, el Signúr e 'l noster Diu,
de ricév la gloria e l'unúr e la puténza,
perchè t'hee creaa tüsscoss
e per mèzz de la tua vuluntaa gh'eren e hinn staa creaa».