Aribert de Intimian
L'Aribert de Intimian (Intimian, 970 - Milan, 16 genar 1045) a l'è staa arcivescov de Milan del 1018 fina a la soa mort.
La vita
ModifegaA l'è nassuu in Brianza del nòbil Gariard. Tra el 1004 e 'l 1005 l'ha faa fà sù de noeuv la basilica de Gallian, che l'esisteva del V secol e le consacra al San Vincenz.
In del 1018 a l'è staa nominaa arcivescov de Milan, cont el consens de l'imperador Enrich II, menter in del 1026 l'incoròna a Milan el Corrad II.
In del 1028 trupp ai sò dipendenz han conquistaa el borgh de Monfòrt d'Alba, che 'l gh'aveva 'me feudatari on osservant de l'eresia catara. La popolazion del paes l'è stada deportada a Milan e invitada a tornà cattòlica: la maggior part l'haa refudaa e donca l'è stada brusada viva in del loeugh che anca al dì d'incoeu el pòrta el nòmm del paes di vittimm: Cors Monfòrt.
In del 1035 l'imperador Corrad II l'ha capii che l'Aribert l'è vegnuu tròpp fòrt e potent e donca el scomincia a combàttel. L'arcivescov l'ha refudaa de piegàss al vorè imperial (che l'era sostegnuu di feudatari minor che eren staa cacciaa via de Milan) e per quest l'è staa sarraa in d'ona fortezza arent a Piasenza. Ma l'Aribert l'è riessii a scappà e a tornà a Milan, indove el gh'ha daa di armi a la popolazion e l'ha fortificaa la città. Milan l'è staa strengiuu d'assedi e 'l 26 de marz el sò arcivescov l'è staa scomunicaa del papa Benedett IX. L'è staa duranta l'assedi a Milan che l'haa faa la soa prima apparizion el Carròccio che poeu el sarà doperaa duranta la Battalia de Legnan (ma anca in alter occasion).
Dòpo la mòrt del Corrad II, l'Aribert l'ha conceduu ai nòbil minor el permess de tormà in città, ma inscì l'ha faa inrabì la popolazion che l'aveva combattuu insema a lù contra l'Imperi. Quand che poeu in del 1040 lù l'ha faa la pas anca cont el fioeu del Corrad, l'Enrich III, l'è staa mandaa via de la città dal pòpol insema a tutti i nòbil.
Cinch ann dòpo, vegg e malaa, l'ha domandaa de vess reportaa a Milan, indove l'è mòrt el 16 de genar. La soa tomba la se troeuva in del Dòmm de Milan.