Buseca a la lombarda
|
Quest articol chì l'è scrivud in lombard, con la Noeuva Ortografia Lombarda |
La buseca, a l’è un segond piat tipich de la cusina milanesa e de la cusina lombarda. De solit la ven paresgiada in del temp de la stagion de l’inverna.
| Buseca a la lombarda | |
|---|---|
 | |
| Origen | |
| Alter nòmm | Busecca (grafia milanesa) Trippa alla milanese (italian) |
| Pòst d'origen |  Italia |
| Region | Lombardia |
| Spantegament | regional |
| Dettaj | |
| Categoria | segond piatt |
| Ingredient principaj | buseca fasoeui passada di tomates carotole remolazz |
In del specifich la buseca l'è fada su di quater part del stomigh del boeuv: rumin, reticul, omas e abomas.
La buseca l'era inscì famosa e consumada a Milan, che l'è diventada vun di simbol de la cità insema al Dom, al panaton e a la Madonina.
Storia Modifega
Un temp la vegniva cusinada in ocorrenza di festività e di fere de paes, normalmente, de tradizzion, a la sera de la Vigilia de Natal. De orìgin milanesa, la s’è poeu spantegada vers i zone arente. Cont el passà di secoi, in ogni zona, e despess in ogni famiglia, l’è stada tirada in pé ona riceta particolara.
La buseca l’è vun di mangià rapresentativ de la cusina milanesa. Per quella reson chì l’epitet "busecon", o ben "mangia-buseca", l’è diventad vun di soranom cont i quai i milanes inn conossud[1].
A l’è fada su de buseca, fasoeui, passada de tomates, carotol e seller. Buseca, in lombard occidental, l’è l’istess de "tripa"[2], o ben l’intrai trad foeura de diverse part del stomich dei boeu e minga, come de solit se cred, del buell (conossud anca come busech)[3].
Preparazzion Modifega
Per preparà la buseca gh’è de besogn de comprà la buseca sgiamò coeusuda, fàlla sgiò a bindellit sotil e ancasì gh’è de besogn de havégh di fasoeui miss a bagn almanch el dì indree. Di alter ingredient inn el lard, la scigola, el seller di quai la ven fada su ona pestada e poeu inn miss a fà frigger cont el buter; dopo de havéi fad rosolà a se sgionten di pom de terra e di carotol fad sgiò a tochelit e di foeuje de verza. Donca ghe se sgionten el sal e ‘l pever e di tomates o la salsa. La buseca la ghe se sgionta domà a quell moment chì e dopo des minut se sgionten anca i fasoeui e la soa acqua. Se slonga con de l’aqua se gh’è de besogn e se fa andà adree a coeuser per almanch un’ora.
Quand che l’è pronta la ven servida con di fete de pan e del parmesan reggian e di fete de pan tostad[4].
Riferiment Modifega
- ↑ (IT) Busecca: la ricetta. 21 Luglio 2015. URL consultad in data 21 Novembre 2017.
- ↑ D'Ilario, 2003, p. 80.
- ↑ Vocabolario Treccani. Trippa. URL consultad in data 27 febbraio 2015.
- ↑ Vera Rossi Ladomez e fracna Matricardi (1954). Il cucchiaio d’argento (in italian). editoriale Domus 1951-1952, 151. ISBN senza ISBN.
Bibliografia Modifega
- Giorgio D'Ilario, Dizionario legnanese, Artigianservice, 2003.