Carlo Porta

Quest articol chì l'è scrivuu in lombard, grafia milanesa.

El Carlo Porta o pussee antigament Carla^[1] (Milan, 15 de giugn 1775 - 5 de genar 1821) l'è staa on poetta milanés. L'è consideraa el pussee grand poetta dialettal de Milan e, anca se l'è minga el pader de la lengua (titol ch'el speccia al Bonvesin de la Riva), el sò milanés l'è quell ch'el se droeuva per scrivv ancamò al dì d'incoeu.

La vita

Fioeu del Giusepp Porta e de la Violant Gottieri, el Porta l'ha studiaa a Monscia finn al 1792 e poeu al seminari de Milan. In del 1796, quand che hinn rivaa i franzés, el sò pader l'ha perduu el lavorà e l'ha mandaa el Carlett a lavorà a Venezia in del fradell, in dove el s'è fermaa finn al 1799. Del 1804 a la mort, che l'è stada el 5 de sgenee del 1821, el Porta l'ha lavoraa come impiegaa statal primma sotta i franzés e poeu sotta el Lombardo Veneto. In del 1806 l'hà toeu la Vincenza Prevosti in miee.

La fama de gran poetta la gh'è rivada gemò in sui ann 1805-1806, quand l'ha convertii in milanés la Divina Cumedia del Dant Ligher, ma la prima stampa ofizial di so oeuver l'è del 1817 — in coa a la Collezione delle migliori opere scritte in dialetto milanese del Francesco Cherubini. Semper in del 1817, el goern dij Asburg l'interoga per la Prineide, ona satira anonima che la circolava a l'epoca de la mort del Giuseppe Prina. Anca se minga riconossuu colpevol, l'è facil che'l Porta l'ha vutà el so amis Tommas Grossi in de la stesura de l'oeuvra.

A la mort, in del 1821, l'ha lassaa on quadern de so poesij dedicà al fioeu, per testament. El confessor de fameja, però, l'ha pensaa che l'era on regal trop immoral per on fiolin e l'ha scancelaa ona part importanta di poesij, in de la qual ghe n'era pussee de voeuna inedita.

L'oeuvra

El Porta l'ha taccaa su a scriv poesij in del 1792: la so prima opera cognossuda l'è l'almanacch El lavapiatt del Meneghin ch'è mort. L'è rivà fin a numm domàa ona part dij do in de la qual l'era spartida.

La soa oeuvra la pò vess spartida in trè categorij: i poesij contra la superstizziôn e l'ipocrisia religiosa; quij che descriven i popolan milanes; e i satir politegh.

Intra i sò oeuver pussee important se regòrden I desgrazzi del Giovannin Bongee scrivuu in del 1810, Olter desgrazzi del Giovannin Bongee del 1814, El lament del Marchionn di gamb avert del 1816, e La Ninetta del Verzee del 1815, el ritratt-confession d'ona loeuggia, che l'è consideraa de la grand part di critegh el sò tocch maister.

In tra i sò poesij "religios" i pussee bej e regordaa hinn Fraa Zenever del 1813, On Miracol del 1813, Fraa Diodatt del 1814 e La mia povera nonna la gh'aveva... del 1810.

Anca se el Carlo Porta el se tegniva foeura officialment de la politega, el gross de la sò oeuvra l'è essenzialment satira politega: come i sonett Paracar che scappee de Lombardia del 1814, E daj con sto chez-nous, ma sanguanon del 1811, Marcanagg i politegh secca ball del 1815, Quand vedessev on pubblegh funzionari del 1812. Ma el Porta l'ha ridicolizzaa anca la noeuva aristocrazia milanesa in La nomina del cappellan del 1819, in del parodià l'episodi de la "vergine cuccia" in Il Giorno (Il Mezzogiorno), de Giusepp Parini (che l'eva anca quella ona satira). In del 1816 el Porta el s'è mettuu cont el noeuv moviment litterari del Romanticismo (Sonettin col covon), ovviament a la sò manera.

El pussee grand espert e critegh del Porta l'è staa el professor Dant Isella.

Oeuver prinzepaj

Brindes de Meneghin all'Ostaria (1810)
La mia povera nonna la gh'aveva (1810)
Dormiven dò tosann tutt dò attaccaa (1810)
Epitaffi per on can d'ona sciora marchesa (1810)
E daj con sto chez-nous, ma sanguanon (1811)
Desgrazzi de Giovannin Bongee (1812)
Quand vedessev on pubblegh funzionari (1812)
I paroll d'on lenguagg, car sur Gorell (1812)
Fraa Zenever (1813)
On Miracol (1813)
Fraa Diodatt (1814)
Paracar che scappee de Lombardia (1814)
Olter desgrazzi de Giovannin Bongee (1814)
La Ninetta del Verzee (1815)
Marcanagg i politegh secca ball (1815)
El lament del Marchionn di gamb'avert (1816)
El sarà vera fors quell ch'el dis lu (1817)
La nomina del Cappellan (1819)
Offerta a Dio (1820)
Meneghin biroeu di ex monegh (1820)

Citazion e omagg

L'è staa in onôr del Carlo Porta che el Lissander Manzôn l'ha mettuu insemma i soll quater vers in lengoa lombarda de la sò produzziôn: On badee ch’el voeur fà de sapientôn / el se toeu subet via per on badee; / ma on omm de coo ch’el voeur parè minciôn / el se mett anca luu in d'on bell cuntee.

Anca el Tomas Gross l'ha scrivuu 'na poesia in onôr del Porta a la soa mort.

L'Henri Beyle, dì Stendhal, che l'era amis del Carla Porta, ghe diseva le charmant Carline, el simpàtegh Carlìn.

La cantautris Elide Suligoj l'ha faa, in del 1978, on album ciamaa "il mio Porta" indova che la interpretava in musega i poesij del Porta.