Davide Van de Sfroos
El Davide Bernasconi (Monscia, vundes de magg del 1965), cognossuu cont el nomm d'art de Davide Van de Sfroos, l'è on cantautor e scritor lombard.
Biografia
ModifegaL'è nassuu a Monscia el vundes de magg del 1965. L'ha abitaa in del quarter de Triant (via Biancamano) fin'a ai quatter agn, quand che la fameja l'è andada a viv a Mezzegra, in sul Lagh de Comm, e indove 'l viv anca incoeu.
La soa prima esperienza musicala l'è stada cont i Potage, on grupp che 'l faseva musega punk. Dopo 'n quai ann l'ha mettuu su on grupp, i De Sfroos, e l'ha taccaa a scriv i sò primm canzon in laghee insemma al sò amis Alessandro Giana. Quei canzon chì hinn staa mettuu in di sò primm produzion musicai: la cassetta Ciulandàri! (1992) e Viif (1994). Col cantà 'sti canzon hann scomenzaa a vess famos arent a Comm e in del Tesin.
Dopo el terz album del 1995 (el primm CD) ciamaa Manicomi, el grupp el s'è dividuu. L'eva el 1998.
In del 1997 el Davide l'ha publicaa el sò primm liber, Perdonato dalle lucertole, cont el nomm de Davide Bernasconi. L'è anca tornaa a fà musega con la Van de Sfroos Band. El primm disch de la band l'è vegnuu foeura in del 1999 e l'è staa ciamaa Brèva e Tivàn (i nomm di duu vent che boffen in sul Lari). Quell'oeuvera chì l'ha faa cognoss anca de la critega musical, tant l'è vera che l'ha anca vinciuu la Targa Tenco 'me artista emergent pussee bravo. In de l'istess temp l'ha publicaa anca Per una poma, on EP con trii canzon che cunten su in d'ona manera minga troppa seria i stori de l'Adamm e Eva, del Cain e Abel e del Noè.
In del 2000 el vegn foeura el sò segond liber, Capitan Slaff, che 'l gh'ha avuu anca on gran sucess a teater.
In del 2001 el ved la lus E semm partii, vun di disch pussee cognossuu. In del 2002 l'ha vingiuu la Targa Tenco per el pussee bell album in dialett.
Intra el 2003 e'l 2005 l'ha scrivuu alter duu liber: Le parole sognate dai pesci (I paroll che se insognen i pess) e Il mio nome è Herbert Fanucci (El mè nomm l'è Herbert Fanucci).
In del 2005 l'ha publicaa el sò sest album Akuaduulza e l'ann dopo on DVD Ventanas, cunt i video di sò concert.
In del 2008 el sortiss el disch Pica!, consideraa vun di sò album pussee bei.
In del cors del 2009 el vegn foeura 40 pass, ona serie de registrazion e de esibizion per la RSI, con scià anca el DVD del concert al Filaforum de Sagh.
El 2011 l'è on ann bell important: el Davide Van de Sfroos l'è invidaa al Festival de Sanremo, e lì el presenta la canzon Yanez, la prima canzon a vess cantada in lombard in tutta la storia del festival. Yanez la riess a rivà anca in di finalista e, a la fin de la competizion, la se piazza a la quarta posizion.
De lì el vegn foeura on gran bell sucess per el Davide, che de lì a poch el publica l'album Yanez. A la fin de l'ann el ved la lus on Best of di sò canzon del 1999 fina al 2011.
I trii agn sucessiv hinn dedicaa ai tournée in gir per tutta l'Italia. In del 2013 el tacca cont el sò noeuv progett musical, compagnaa anca de on videoclip, ciamaa Terra & Acqua, che 'l vegnarà terminaa in del 2014 con la publicazion de on DVD.
In del 2014 el vegn publicaa el disch noeuv, ciamaa Goga e magoga, preceduu del singol omonim.
Infina in del 2021 l'è vegnuu foeura Maader Folk, cun dent anca un featuring cunt Zucchero Fornaciari (Oh Lord, vaarda gio)
Discografia
Modifega- 1992 - Ciulandari (cont i De Sfroos)
- 1994 - Viif (cunt i De Sfroos)
- 1995 - Manicomi (cont i De Sfroos)
- 1999 - Brèva e Tivàn
- 1999 - Per una poma
- 2001 - E semm partii
- 2003 - Laiv
- 2005 - Akuaduulza
- 2006 - Ventanas (DVD)
- 2008 - Pica!
- 2009 - 40 pass
- 2011 - Yanez
- 2011 - Best of 1999-2011
- 2014 - Terra & Acqua (DVD)
- 2014 - Goga e Magoga
- 2015 - Synfuniia
Coriosità
Modifega- El Davide l'è famos anca perchè l'è on tifos del Comm (Como Calcio), tant che l'è andaa anca a la trasmission televisiva de la Rai Due “Quelli che il calcio” (Quii che el folber) a fà el telecronista.
Bibliugrafia
Modifega- Perdonato dalle lucertole (1997) (Perdonaa di lusert)
- Capitan Slaff (2000)
- Le parole sognate dai pesci (2003) (I paroll che se insognen i pess)
- Il mio nome è Herbert Fanucci (2005) (El mè nomm l'è Herbert Fanucci)