Elezzion ministrative de Milan del 2021

Quest articol chì l'è scrivud in lombard, con la Noeuva Ortografia Lombarda

I elezzion ministrative de Milan del 2021 gh'è stadr el 3 e 'l 4 de otober 2021 per catà foeura el sindegh de Milan per el mandad 2021-2026, oltra che i member del Consili Comunal e i noeuv President di Municipi cont i so Consili.

Elezzion ministrative de Milan del 2021
Stat		Italia
Comun		Milan
Data		3 e 4 de otober 2021
Candidads		Giuseppe Sala	Luca Bernardo
Partid		Europa Verda	Independent
Coalizion		Center-sinistra	Center-destra
Voti		277'478 57,7 %	153'637 32,0 %
Sindegh de prima
Giuseppe Sala
2016 2026

De solet i elezzion comunai in Italia se fann in tra el 15 de avril e 'l 15 de sgiugn, ma inn stade spostade del governo a causa del COVID-19.

Sistema eletoral

Per el comun, el candidad sindegh el po vincer al prim turn cont el 50%+1 di vot valid, se nissun ja ciapa, a gh'è un ballotagg. Quell che 'l vensg el ciapa un premi de magioranza del 60% di scagn, ma domà se 'l ciapa almen el 40% di vot al prim turn. Domà i coalizzion che ciapen almen el 3% ciapen un scagn.

In di municipi, l'è assee ciapà el 40% al prim turn, e se gh'è un paregg el vinc el pussee sgiovin.

Scerna di candidad

Center-destra

El center-destra gh'ha mitud un poo a trovà un candidad: prima de la pandemia de COVID-19 el Giulio Gallera el somejava el candidad in pectore de la coalizzion, ma poeu l'è borlad un poo in desgrazzia, a eren stad insubid prima el Paolo Veronesi, poeu el Paolo Del Debbio, poeu el Maurizio Lupi, poeu el Roberto Rasia Dal Polo, poeu l'Alberto Zangrillo, l'ex sgiugador de folball Franco Baresi e anca el retor del Politecnegh Ferruccio Resta. El pareva, in principi, sgiamò scernud l'Oscar di Montigny, imprenditor assee sostegnud de la Liga, ma l'è andad no ben, poeu l'ex sindegh Gabriele Albertini, che infin l'ha scernud de correr no e 'l somejava che l'havaria fad el vicesindegh per la coalizzion, e infin a l'è stad catad foeura el Luca Bernardo, pediatra de l'Ospedal di Frati.

Center-sinistra

Per el center-sinistra la strada a l'è stada assee svelta: el sindegh che 'l sortiva Giuseppe Sala l'ha nonziad de candiàss ancamò a fin 2020, senza una lianza cont el Moviment 5 Stelle, e l'è stad bon anca de conciliàss con Europa Verda, che la voreva fà 'na candidatura autonoma dopo che 'l Sala l'ha fad tajà di piante per lassà spazzi a 'n noeuv campus del Politecnegh. El 12 de marz 2021 el Sala el s'è sgiontad a Europa Verda.

Candidad

Coalizzion		Liste		Candidad	Note
	Center-sinistra		Partid Democrategh	Giuseppe Sala
			Beppe Sala Sindegh
			Milan Unid - La Manzina per Sala
			I Reformista - Lavorom per Milan
			Europa Verda
			Milan in Salut
			Volt Italia
			Milan Radical
	Center-destra		Liga	Luca Bernardo
			Fradej d'Italia
			Forza Italia
			Luca Bernardo Sindegh
			Maurizio Lupi - Milan Popolar
			Partid Liberal Europee
	Moviment 5 Stelle			Layla Pavone
	Mariani Sindegh		Milan in Comun	Gabriele Antonio Mariani
			Civega AmbientaLista
	Goggi sindegh		Socialista per Milan	Giorgio Goggi
			Milan Liberal
	Partid Comunista			Alessandro Pascale
	Poder al Popol			Bianca Tedone
	Partid Gay			Mauro Festa
	Milan el scomincia chinscì			Bryant Biavaschi
	Italexit			Gianluigi Paragone
	Partid Comunista di Lavorent			Natale Azzaretto
	Partid Comunista Italian			Marco Muggiani
	Moviment 3V			Teodosio De Bonis

Programa

Sala

El programa del Sala a l'è fondad in sui robe fade in di cinch agn de prima, con l'idea de 'na "cità a quindes menut" indova che i servizzi poden vesser pussee vesin al citadin, un des'centrament pussee fort e di roeul pussee per i municipi.

A gh'è anca l'atenzion a l'ambient, con pussee piante in la cità e di zone senza veicoi che inquinen e 'l sgiontà insema di vari parch in d'un unegh parch metropolitan, pussee zone 30 e 'n slargà del straport publegh e de la mobilità compartida.

L'insubiss 'n ciapà 500 pussee de Ghisa per havégh 'na cità pussee segura, de investì in di presidi de polizzia e de fà su i Cà de la Salut, per fà pussee forta la sanità territorial.

Bernardo

El Bernardo el volaria meter al segur la cità a ciapà 600 pussee de Ghisa e a toeu via tucc i camp di zingher e i center sociai irregolar.

El voeur fà 'n sistema de jut ai disabel, cont un assessorad aposta e 'n toeu via di barrere architetoneghe e 'l tele-socors per i sgent a ris'c. Per la sanità territorial el voeur fà 'n pian per garantì un tot de dotor de bas in d'ogni quarter.

El voeur sbassà i tasse e la burocrazzia, inscì de fà Milan 'na capital di "start-up", e 'l sostegn el des'centrament ai municipi e l'elezzion direta del Sindegh de la Cità Metropolitana de Milan.

Per la mobilità, el voeur toeu via l'Area C per tornà a Ecopass, scassà i ciclabil a ris'c e eletrifegà a la svelta el straport publegh, e de ativà la linia M4 subit de fà andà el metrò 24 ore in del fin de la setimana.

Pavone

La Pavone la voeur una cità inclusiva, ecologega, che la consuma poch e conetuda ben, senza periferie problemateghe, assee incentrada in sui quarter, inscì de evità trop de spostament. La voeur trasformà l'Area B in d'un sistema de pedagg per andà dent in la cità, compagn del vegg Ecopass, e pussee de zone 30 e isole pedonai.

Mariani

El Mariani el voeur 'na cità pussee accessibel, che la costa manch, e con men de desuguajanze, senza speculazzion di cà.

Goggi

El Goggi el voeur dervì ancamò i Navili e dedicàgh 'n assessorad, dedicad anca ai aque, e 'l pensa che 'l saria assee per sistemà la viabilità del center de Milan.

Pascale

El Pascale el pensa che Milan el sibia ostagg del capitalismo e che 'l comun el gh'ha de jutà domà i aziende piscinine, a pat che ghe dann assee de dirit ai lavorent, e che i noeuve aziende gh'hann de vesser fade su del Consili Comunal, insema ai lavorent, che besogna sbassà i diferenze de redit in tra i zone e restruturà i cà del comun per dàj a la sgent, e tassà pussee i gran patrimoni.

Tedone

La Tedone la voeur un "Milan publegh", che 'l sibia no un "parch sgioeugh" per i sciori. La voeur anca men de precariad e de esternalizazzion di servizzi municipai.

Festa

El Festa el voeur un Milan gestid compagn de 'na gran azienda e che 'l sibia semper sensibel ai necessità di minoranze, inclusa quella LGBT, con de la formazzion per savé come tratàj, e fà di cà de recojenza per quei a ris'c e che besògna lavorà per dàgh a Milan 'n imagen miteleuropea e ciapà sgent e investiment de tuta Europa.

Biavaschi

El Biavaschi el voeur un Milan minga partid di ideologie, la vertura di Navili, la cità a 15 menut e slargà la metropolitana verda fina in via Rivamont, di zone franche con i tasse pussee basse e 'n Milan che 'l scomincia di quarter.

Paragone

El Paragone l'insubiss de sbassà i tasse, soratut ai sgioven e ai familie, de fermà la privatizazzion di aziende publeghe, de tutellà i aziende piscinine e i boteghe, de toeu via i aree B e C, di criteri noeuv per i cà popolar e de difender i sgent del perder la cà, pussee de sigurezza, soratut per i periferie, 'na sanità del territori pussee forta, el no a la certifegazzion verda del COVID-19 in la scoeula, 'na tassa de soggiorn per i obergh de luss e 'n evoluzzion tecnologega per l'ambient.

Azzaretto

Azzaretto el voeur un Milan che 'l sibia no in man ai "poder fort" ma al popol, representad di assemblee di citadin, pussee spazzi de socialità e 'n straport publegh che 'l costa men.

Muggiani

El Muggiani el voeur "domignà el capitalismo" in su modell chines, cont el meter, per esempi, di limit in sui prezzi del vender di cà, meter pussee cà popolar e dà pussee lavorà publegh e esternalizà men i servizzi.

De Bonis

El De Bonis a l'è contrari al vacin contra el SARS-CoV-2, a la certifegazzion verda, al distanziament social e ai restrizzion contra el COVID-19, el stop al 5G e la contrarietà al bancomat, con la proposta de fà pagà men quei che doperen i contant.

Resultad

Municipi

Tucc i Municipi de Milan inn andad a la coalizzion de center-sinistra.