Esecuzion speculativa
L'esecuzion speculativa a l'è la tecnega indova on sistema informategh el fa di operazion senza la sicurezza che i sò resultaa sien doperaa, part de l'esecuzion foeura orden, per ottimizzà l'esecuzion di programma, cont di algoritm che deciden i cas pussee probabil de eseguì, de solit implementaa a nivell de microprocessor.
Degià che i moderni microprocessor doperen la pipeline di istruzion se, per esempi, on software el gh'ha di diramazion el branch predictor el decidarà la diramazion pussee probabil e i sò istruzion a hinn eseguii speculativament, vist che la possibilità che 'l sia el ramm giust a l'è volta. Se la predizion a l'è fallada, i resultaa a hinn trasaa via. 'N altra forma de esecuzion speculativa a l'è el slipstream, indova che del programma a hinn tolt via di part retegnuu inutil e 'l programma modifegaa a l'è confrontaa cont quell original per verificà che sien logicament compagn.
In del 2018 a hinn staa descovert di important vulnerabilità de 'sti fonzion che permetten de descovrì di part de memoria riservaa 'me Meltdown, Spectre e Foreshadow. Cont el temp, n'hinn staa descovert an'mò pussee, per esempi in del 2022 hinn staa nonziaa Pacman e Retbleed, e 'l s'è descovert che se poden mett insema a di alter attacch, compagn di Rowhammer, per slargànn i capacità, per esempi in Spoiler.