Galata Capitel Cinch

Quel articul chì l'è scrivüü in Lumbard, cun l'urtugrafia insübrica ünificada.

Galata

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Cinch

¹El Crist el m'ha faa liber per la libertaa; dunca, stee sald e che siuv no tegnüü de növ cunt un giuv de servitü.
²Vara, mì, Paul, ve scrivi che se sii circuncis, Crist el farà bén nagott a vialter. ³E duu testimunianza de növ a ogni persona che l'è circuncisa che l'è debitúr a fà tüta la lég. ⁴Sii staa separaa del Crist, vialter che sii faa giüst in de la lég, sii burlaa föra de la grazia. ⁵Già che nümm spetum la speranza de la giüstizia de féd, per el Spirit. ⁶Già che in del Crist Gesü né la circuncisiún né l'incircuncisiún la gh'ha forza, ma la féd che la laur per mèzz del bén.
⁷Currevuv bén; che roba la v'ha impedii d'übedì in de la veritaa? ⁸La persuasiún l'è no de lü che 'l me ciama. ⁹Un puu de levaa el fa levà sü tütt el gnocul. ¹⁰Gh'huu cunfidénza per vialter in del Signúr che pensarii nagott alter; e lü che ve destürben el purtarà 'l giüdizi, chissessìa 'l sia. ¹¹E mì, fradèj, se predichi ancamò circuncisiún, perchè sun ancamò persegütaa? Alura 'l scandul de la crus el sarìa abulii! ¹²Magara che quij che ve inzighen anca se tajassen via! ¹³Già che vialter hinn staa ciamaa a la libertaa, fradèj, dumà no la libertaa per dà un'upurtünitaa a la carna, ma per mèzz del bén servii el vün i alter. ¹⁴Già che ogni lég l'è fada pièna in d'una parola: «Vurarii bén el tò prossim cuma té medemm». ¹⁵E se sgagnii e majii sü el vün i alter, vedii che sii minga cunsumaa el vün di alter.
¹⁶E disi: caminee in del Spirit, e cumpirii no el desidéri de la carna. ¹⁷Già che la carna la desidera cuntra 'l Spirit, e 'l Spirit cuntra la carna, perchè chèst uponen el vün l'altra, perchè faghuv minga i coss che vurii fà. ¹⁸E se sii menaa del Spirit, sii no suta la lég. ¹⁹E hinn ciar i oper de la carna, che hinn furnegaziún, impüritaa, spüduratéza, ²⁰idulatria, magìa, nemessízi, cuntésa, gelusìa, ir, gara, divisiún, eresi, ²¹invidia, ciuchéza, baldori e robb cumpagn de chèst, che a ve disi prima, propi cuma huu dii prima che quij che fann taj coss ereditarànn el règn de Diu. ²²Ma 'l frütt del Spirit l'è bén, letizia, pas, paziénza, gentiléza, buntaa, féd, ²³mansuetüdin e cuntroll de sé medemm: cuntra taj coss la gh'è minga una lég. ²⁴E quij del Crist Gesü hann crusefiss la carna cunt i sò passiún e desidéri.
²⁵Se vivum per el Spirit, duarìum anca caminà per el Spirit. ²⁶Che devegnum no vanagluriús, ciamand inanz el vün i alter, avendugh l'invidia el vün per i alter.

Navigaziun

• ← Indree a Capitel Quater
• Inanz a Capitel Ses →
• A l'indes