Galata Capitel Quater

Quel articul chì l'è scrivüü in Lumbard, cun l'urtugrafia insübrica ünificada.

Galata

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Quater

¹E a disi che per tant témp quant l'ered l'è bagaj, l'è no divèrs d'un sèrv ancabén l'è 'l padrun de tüsscoss, ²ma l'è suta vardian e aministradúr fin al témp stabilii del pader. ³Inscì anca nümm, quand serum bagaj, serum tegnüü cuma s'ciav suta i element del mund; ⁴ma quand la pienéza del témp l'è vegnüda, Diu l'ha mandaa föra 'l sò fiöö, devegnüü d'una dona, devegnüü suta la lég, ⁵per cumprà quij che eren suta la lég perchè ricevessum l'aduziún. ⁶E perchè sii fiöö, Diu l'ha mandaa föra 'l Spirit del sò fiöö in di noster cör che 'l cria: «Abba, Pader», ⁷dunca sii pü sèrv, ma fiöö: e se un fiöö, anca un ered per mèzz de Diu.
⁸Ma menter, perchè avii minga cugnussüü Diu alura, sii staa tegnüü cuma s'ciav a quij che de natüra hinn no dei, ⁹adèss, ancabén cugnussii Diu--ma pütost sii cugnussüü de Diu--cuma turnii indree de növ a i element dèbuj e por, di quij vurii vèss tegnüü de növ cuma s'ciav? ¹⁰Usservii dì, mes, stagiún e agn-- ¹¹gh'huu pagüra de vialter, che forsi huu travajaa in van per vialter.
¹²Che devegnii cuma sun mì, perchè sun cuma sii vialter; fradèj, ve preghi! M'avii ufès in de nissün möd; ¹³e savii che per via de debuléza de la carna v'huu predicaa 'l vangel la prima völta, ¹⁴e avii minga desprezaa né refüdaa 'l voster pruà che l'era in de la mia carna, ma m'avii ricevüü cuma un angiul de Diu, cuma 'l Crist Gesü. ¹⁵Dunca, due l'è la vostra beatitüdin? Già che ve duu testimunianza che, se 'l fuss pussìbil, ve sarìuv scrasaa i ögg e m'i avarìuv daa. ¹⁶Dunca, mì sun devegnüü el voster nemís perchè ve disi la veritaa? ¹⁷Gh'hann invidia per vialter no bén, ma vören saràv föra, perchè gh'abiuv invidia per lur; ¹⁸E l'è bun avègh invidia in del bén semper, e no dumà quand sun là cun vialter. ¹⁹Mè bagaj, per quij mì senti i dulúr del part de növ fin che 'l Crist l'è furmaa in de vialter; ²⁰e huu vursüü vèss là cun vialter adèss e cambià la mia vús, perchè savi no che cossa de fà de vialter.
²¹Diim, vialter che vurii vèss suta la lég, sentii minga la lég? ²²Già che l'è scritt che Abraham el gh'ha avüü düü fiöö, vün de la sèrva e vün de la dona libera. ²³Ma menter lü che l'era de la sèrva l'è generaa segund la carna, lü che l'era de la dona libera l'è generaa per mèzz d'una prumèssa. ²⁴Chèstcoss hinn parlaa cuma un'alegoria: già che chèst hinn düü acordi: vün de munt Sinai che 'l genera in de la servitü, el qual l'è Hagar. ²⁵E la Hagar l'è 'l munt Sinai in de l'Arabia: e l'è cumpagn de la Gerüsalèmm d'incöö, degià che l'è tegnüda in del servitü cunt i sò bagaj. ²⁶Ma la Gerüsalèmm de sura l'è libera, la qual l'è nostra mader. ²⁷Già che l'è scritt:
«Che te gh'hee letizia, dona sterila che te fee minga bagaj,
s'cepa de letizia e cria, tì che te sentet minga dulúr del part:
perchè i bagaj de la dona bandunada sarànn tant püssee
che de lee che la gh'ha un marì».
²⁸Ma nümm, fradèj, sèmm bagaj de la prumèssa per via d'Isaach. ²⁹Ma propi cuma alura lü che l'è generaa segund la carna 'l gh'ha persegütaa lü che l'è generaa segund el Spirit, inscì l'è anca adèss. ³⁰Ma che roba la dis la Scritüra? «Manda via la sèrva e 'l sò fiöö»: degià che 'l fiöö de la sèrva l'ereditarà nagott cunt el fiöö de la dona libera. ³¹Dunca, fradèj, sèmm no bagaj de la sèrva ma bagaj de la dona libera.

Navigaziun

• ← Indree a Capitel Trii
• Inanz a Capitel Cinch →
• A l'indes