Gera d'Adda
La Gera d'Adda (in Italian anca Ghiara, Ghiera o Giara d'Adda) l'è ona region stòrica de la Lombardia (situada in de la [Pianura Padana]) che l'è compresa tra el fiumm Adda a òvest, el fiumm Seri a est e 'l Fòss Bergamasch a nòrd. El confin a sud inveci l'è minga ben definii e l'è semper staa oggett de discussion, anca se tendenzialment el correspond al confin meridional de la Provincia de Bergom pù i comun cremasch de Gnidell, RIvòlta e Vailaa. Ghe viven circa 110.000 abitant, distribuii in di provincc de Milan, Bergom e Cremòna. I comun pussee important a hinn Trevij, Caravagg e Rivòlta.
El territòri el gh'ha avuu ona stòria particolar, perchè anca se per la pupart el partegn a la Provincia de Bergom, l'è storicament legaa al Milanes: de fatt, quand che la Repubblica de Venezia l'ha conquistaa el Bergamasch, quella zòna chì l'è restada in del Ducaa de Milan. Anca al dì d'incoeu, bòna part di comun del territòri hinn situaa in de l'Arcidiòcesi de Milan e a quella de Cremòna pù che in quella de Bergom (domà Pagazzan).
I comun del territòri
Modifega- Provincia de Milan: Cassan su l'Adda (domà perchè ona part del sò territòri el se troeuva a est de l'Adda. I sò frazion de quella banda del fiumm fann part de la diòcesi cremonesa).
- Provincia de Cremòna: Gnidell, Rivòlta e Vailaa.
- Provincia de Bergom: Arzagh, Brignan, Calvenzan, Casiraa, Calòniga, Fara, Misan, Caravagg, Mozzaniga, Fornoeuv, Pontiroeu, Pagazzan, Castell Rozzon e Trevij.