Gigant gassos

Quest articol chì l'è scrivuu in lombard, grafia milanesa.

Un gigant gassos l’è on pianetta gigant minga compognuu per la pupart de preja o olter materiaj soled, ma de flued, siben che quist pianetta chì pœuden avèggh anca lor on nucli roccios o metallegh. Se pensa che l’esistenza de on nucli la sia necessaria al moment de la formazion del pianetta, ma la part pusse granda de la soa massa l’è sotta forma de gas, o gas comprimuu al statt liqued.

I gigant gassos del Sistemma Solar: a partì de in scimma, Nettun, Uran, Saturna e Giœu (dimension minga in scala).

A differenza di pianetta roccios, i gigant gassos gh’hann minga de superficia ben definida. Concett coma dimension, area superfizial, volumm, temperadura superfizial o densitaa superfizial pœuden referìss al stratt pussee esterna del defœu’, per esempi vist de la Terra.

Ind el sistemma solar gh’è quatter gigant gassos: Giœu, Saturna, Uran e Nettun. Quist quatter pianetta vegnen anca ciamaa “pianetta giovian” o “pianetta esterna”.

Uran e Nettun hinn staa consideraa di studios coma ona sotta-class despartida de pianetta gigant, ciamada “gigant gelaa”, o “pianetta uranian”, perchè la soa struttura l’è per la pupart fada de giazz, preja e gas. I se differenzien de Giœu e Saturna per via de la proporzion de idrogen e eli che l’è pussee bassa, prenzipalment per via de la distanza del Sô che l’è on bell poo pussee granda.