Giovann Antoni Cotta
|
Quest articol chì l'è scrivud in lombard, con la Noeuva Ortografia Lombarda |
El Giovann Antoni Cotta (Giovanni Antonio Cotta in italian, ... - dopo del 1481) l'è stad un politegh e nobel milanes.
Biografia
ModifegaFioeul de Peder e de la Madalena Leonatini, in del november 1461 l'è stad part de l'imbassaria insema al Tomas Moron, al Peder de Posterla e al Lorenz de Peser mandada del Duca de Milan per omagià el Luis XI de Franza per el so salì in sul trono. L'è staa poeu imbassador de Milan a Roma, senza nissun particolar obietiv otegnud.
El 5 de marz 1468 l'otegn del Duca una pension e poeu l'è nomenad l'ann dopo camerer imperial.
Semper in del 1469 l'è testimoni de 'n at del Galeazz Maria Sforza indova che 'l stabiliva la sucession ereditaria con la mier.
L'è inscì ben vist del Duca che el 20 de marz 1470 l'è infeudad de la Valcuvia insema ai fradei, ma poeu s'hann puu notizzi de luu fina a la mort del Duca, e se pensa donca che la soa carera la gh'habia havud un ralentament.
In del 1476 Genoa la proeuva a toeuss via del giov milanes ma l'è prest missa ancamò sota el control meneghin cont un'operazion de l'Otavian Maria Sforza e del Lodovigh el Moro, indova che luu l'è comissari de guerra.
In l'agost l'è mandad in Corsega 'me governator per la segonda voeulta, dopo de 'n curt mandad in del 1468, ma l'è prest menad via del Tomasin Fregos e sostituid del Battista Geraldino d'Amelia; liberad prest, l'è mandad per un ann 'me comissari a Dòm, al post de l'Ambrosin de Longhignana, malad, ma l'è prima mandad in Toscana in su domanda de la regenza del Lorenzo de Medici, 'me comissari de l'armada.
Rivad al trono el Moro el noeuv Duca el se mostra a so favor, desgià che l'è ciamad in del Consili Secret e in del 1480 l'è nomenad Comissari de Parma, ma poeu l'è spostad a Piasenza.
In del fevrer 1481 el va a Napoli per discuter cont el Lorenzo de Medici e convincel a acetà i pat de restituzzion de la Lunigiana, ocupada del Re de Napoli.
El gh'ha sucess, e de quella data el se sa puu nient de luu.