Wikipedia

Lamù (personagg)

Lumbard ucidental Quest articol chì l'è scrivuu in lombard, grafia milanesa.

Lamù (ラム Ramu?) a l’è 'n personagg immaginari e la coprotagonista de la serie manga e anime Lamù, tirada in pee de la Rumiko Takahashi.

Archivi:LamùTV.jpg
La Lamù in d'on episodi de l'anime

Stòria del personagg

Modifega

El Rumiko Takahashi el gh’aveva riservaa a lee on mestée marginál. El ver protagonista de la série, defàtt, l’è l’ Ataru Moroboshi e la Lamù la gh’ERA de vèss domà on personagg importánt ma minga el principal.[1] In del prim capìtol del manga Una buona preda, la Lamù la gh’hà avùu on gran succèss intra i fan deL Takahashi che, de poeu de avè vedùu che ‘l personagg de la tosa aliena el gh’era nò dent in del segond capìtol Un povero diavolo (“On pover diavol”), i hann suttàa a ciamànn el ritórna in la serie. Del tèrz capìtol del manga la Lamù la ven ‘na presenza fissa, la quatta ‘na part de coprotagonìsta insema a l’Ataru e la diventa in seguit vun di personagg pussée amàa e rapresentativ de l’animazión giapponesa. Quest 'l la fa diventà on esempi paradigmàtich de la sindrome del Fonzie.

Aspètt e personalità

Modifega

La Lamù a l’è ‘na tosa aliena de aspètt compàgn d’on véss uman, molto bèlla e certamént sensuál. La gh’hà 17 ann, l’è alta 1,60 m e i sò misùr de sen, vita e fianch hinn 84-56-85. La gh'hà i cavèj coloràa, i orègg a ponta, i dent canin che se veden intanta che la l’è ‘dree a rid o la se inrabìss e duu còrni de forma cònica in sul coo (ch’a hinn la sorgent di sò podè extraterrèster). I sò oeugg hinn bloeu cobàlt e i gh'hann su un bellètt celèst come machiàsg. In del manga, i sò cavèj longh a hinn d’un colór minga fiss, compàgn de quell de la lus rifletuda d’on cd. In de l'anime, per semplificàgh el mestée ai disegnadór, i cavèj de la gióvina aliena i ciapen un colór verd[2] ò, raramént, bloeu.

De sòlit la gh’hà su on bikini e di stivàj, tucc duu tigraa, che in effètt a hinn la soa montura extraterrestra. Despess la gh’hà su anca di vestìi terrèster, come la divisa del Liceo Tomobiki (in particolar un fuku a la marinara).

La personalità de la Lamù la s’è sviluppada e l’è madurada in del cors de tutta la stòria. De fàtt, a l’inviada, la ven presentada come una tosètta dispettósa, caprizziósa, irascìbil e crappóna, e anca 'ma la sorgent principál de guai de l’Ataru (che lee comunque l’ama sinceramént). In di sò primm compàrsi despess la gh’hà 'n contègn de demòni, che ‘l se smòrza de manemán adree al svilùpp del personàgg. Quand che ‘l taca a stà fiss de cà in di Moroboshi, la taca a madurà e ‘l ven pussée dòcila e sensibil con tut quii che fan part de l’univèrs Tomobiki, oviament se ‘l soggèt in question el se mètt minga in mèzz infra de lee e ‘l sò "Tesorètt".

La pupàrt di volte l’è assosènn rilassada e la gh’hà piasè di stranèzz e di ben de la Tèrra, ma l’è semper 'drée per rispóndegh con di descàregh elèttrich potént a tut quii che la fann inrabì, de sòlit l’Ataru o chi che ‘l ghe dà adoss al sò tesorètt. ‘Na vòlta che la minaccia l’è andada via, la Lamù la ven de noeuv allégra. Assosènn gelosa de l’Ataru, le fulmina con violenza tucc i vòlt che l'è 'dree a morosà cont on’altra tósa (o se lù la insulta o ghe fa un quaicoss de fala diventà infeliz), ma a la fin le perdòna semper. A bon cunt la Lamù l’è dólza, fedél e la gh’hà on bèll caràtter.

A l’inviada, la relazión de la Lamù cont la Shinobu l’era assosènn burrascósa, degià che la Lamù la considerava el Shinobu ‘me la gimàcca de l’ Ataru e l’hà fa tutt el possibil per romper la relazión infra l’Ataru e la Shinobu (comprésa l'utilizzazión del sò UFO cont el fin de desturbà i telefonàd de l’Ataru e de la Shinobu[3] e cont el dì de vèss gravida [4] del fioeù de l’Ataru). A la fin l'odi recìproch intra de lee e la Lamù el se smòrza fina a diventà on'amicizia pussée concisa. Ancabén che Lamù la considera el Shutaro Mendo, la Megane, el Perma, el Kakugari e la Chibi come di boni amis e la ne apprèzza la compagnia, lee la ghe voeur minga ben a lor compagn che lor vers de lee e la dis ciar e net che la ghe voeur ben domà al sò "tesorètt".

La Lamù l’è intelligenta, ma molto ingenoa in quant a la vita in su la Tèrra, cont ona vision del mond compagna de quèlla di fiolitt de l'asìlo. L'hà riessì a adatàss a la vita in su la Tèrra grazie a la soa tecnologia. La gh’hà i qualità de la miée ideál de la società giapponésa, desgià che, quand che l'è libera, la ghe stà adrée a l’Ataru e la iutta soa "sòcera" a fà i mestée. La Lamù l’è pràtica de drovà la tecnologia e la se porta adrée diversi oggètt sofisticad de la soa società, di quai on quaivun scondùu in del sò bikini. [5]. Despèss i sò intenzion hinn nòbil, per esempi el copià on quadèrno cont el fin de iuttà l’Ataru a studià per on cómpit[6], ma de rar i risultàa hinn quèi vorsùu.

Biografia

Modifega
Archivi:Lamù.jpg
La Lamù in la covertinna del second numer del manga, publicad in Italia.

La Lamù a l’è 'n'aliena vegnuda del pianètta Oniboshi (stèlla cattiva) popolàa de Oni. Compagn che tutt i Oni la gh’hà di caratterìstich fìsich particolár: di canin guzz, di orègg a ponta e duu cornit miss a l'altèzza di témpi. La Lamù l’è bòna de sgorà (caratteristica reditada del pader) e de ingenerà di descàregh elèttrich [7] ('me soa mader); a par che l'aj el sia el sò ùnich pont débol tanmt che l’odór l’è assee de ris’cià de tarnegàla. I umeboshi i gh'hann in su de lee 'n'effèttcompagn de quèll de l’alcol in sui vèss umán, lee la ciapa la ciòca domà a mangiànn vun.[8] La Lamù l’è nò ‘na coeuga brava e la magna di pitánz estremamént piccánt; al’è inveci bòna de realizzà di bèj intràchen che, grazie a soa la tecnologia aliena, i ghe permètten de risòlv di situazión che i vèss uman sarissen minga boni de risòlv.

Lamù la riva in su la Tèrra quand che i Oni i deciden di conquistà el pianètta. I alién, però, ghe concénden ai òmen la possibilità de salvàss: se 'ni rappresentánt di omen cataa foeura intra tutt i terrèster (Ataru) el sarà bon de brancà el rapresentánt di Oni (Lamù) alora lor i rinonziarànn ai sò propòsit de invasión. La gara la ven vinciuda de Ataru che, per la giòia, el cria al mond che a la fin di fin el podarà sposàss. I paròll del bagai a hinn per la Shinobu, la soa morosa, ma la Lamù la cred che sien per lee e che l’Ataru el gh'abia intenzion de sposàlla. Despoeu de quèll malintés chì, la Lamù la tacca a comportàss ‘me la fudèss la miée de l’Ataru e la se trasferìss in la cà di Moroboshi a temp indeterminàa; soratut in di primm episodi la vita del bagai l’è trada dal caràtter invadent e ostinàa de l'aliéna.

La Lamù, amalastant la dichiaraziؚón fada nò a posta de l’Ataru, l’è innamorada sincerament de lù. El fioeu, però el preferìss a fàgh el fil ai alter dònn e a trascurà la Lamù che, de fat, l’è l'ùnica a aprezzàll. L’Ataru, amalastánt el sò contègn in di confrónt de la Lamù, el ricambià divèrsi vòlt l'amór de l'aliena pur senza riessì mai a dìgh ciar e nètt i sò sentimént. La Lamù, in quant a lee, la par de acetà el contègn de l’Ataru e ‘l fatto che lù 'l ghe varda adree ai alter dònn: in de l’episòdi Mondi paralleli’' (“Mond parallei”) la Lamù la se troeuva in di realtà spazziai e temporai divèrsi che propònnen divèrsi futur possìbil. In voeuna de ‘sti realtà chì l’Ataru el ghe dìs ciar e nètt che el ghe voeur ben e l’è assosènn premurós con lee; la tosa, amalastánt la situazión favorévol, la se incòrg de trovàss in d’ona realtà minga compagna del ver e donca la bandòna quèll futur possìbil chì e la torna a la realtà indove l’Ataru a l’è 'n vivoeur ostinàa.

La Lamù l’è amorévola e premurósa vèrs l’Ataru, e lee le ciama cont el soranòmm de tesoruccio (tesorètt) ò, pussée de rar, amoruccio (“amorèt”) (in la versión originál el soranòmm de l’Ataru al’è darling). La Takahashi l’hà deciarà de vèss ispirada al telefilm americán Vita de stria per la stòria de l’ Urusei Yatsura: in del telefilm Samantha, 'na stria comparsa in d’on bòtt in su la Tèrra, la spósa 'n òmm che ‘l se ciama Darrin Stevens. La paròla inglesa darling (doperada de la Samantha per ciamà el marìi) in katakana es scriv dārin (ダーリン?), tèrmin che ‘l ven doperad de la Lamù con l’Ataru.

Puranca per via del caràtter de l’Ataru, la Lamù è estremmamént gelósa de lù. Despèss lee la ghe fa scuntà al sò amàa di castìgh corporài (soratùtt i sò descèregh eléttrich dolorós) ò la tira in pee di intràcchen per tegnì d’oeugg l’Ataru e prevegnì di sò possìbil tradimént. La Lamù, de sòlit, coi alter protagonista, l’è assosènn quiètta e a ghe pias la compagnìa, cont on’innocénza de fiolina. La se inrabìss domà quand che ‘n quaivun el tràtta mál l’Ataru, e in del cas la trata lù a l’istessa manera de l’Ataru quand che ‘l fa el socchée.

In del córs de la stòria, la Lamù, per tegnì d’oeugg l’Ataru, la se iscriv al liceo Tomobiki in de la stèssa class frequentada del bagài e intratanta la diventa a la svelta l’oggèt del desideri di compàgn de scòla.

In la version original de l'anime la Lamù la se riferiss a lee medésima cont el termin "uchi" (うち?), e la tèrmina i sò fras con la paròla "~daccha" (～だっちゃ?). Quèsta paròla chì, considerada deperlée, la significa "sì"; el fatto de giontàlla a la fenitiva di fras l’è tipich di pivèllj e ‘l ghe dà enfasi ai conotàa kawaii del personàgg.

Origin del nom

Modifega

El nòmm "Lum" l’è on omàgg a l’Agnes Lum, ona gravure idol assosènn popolár in Giappón infra la seconda metà di ann settanta e ‘l princìppi di ann vottanta de indove la Takahashi l'hà ciapà l'ispirazzion per inventà el personagg de la Lamù. Lum l'è anca ‘na variant del soranòmm de l'autris (Rum): in giapponés el son di lètter "R" e "L" el pò vèss scambiàa de manera de fà vegnì possibil la scritura del nómm con tucc dò i grafìi.[9]

In la version italiana del manga e de la serie televisiva a l’è stada minga scrivuda come Lum, ma putòst come Lamù.

Doppiagg in la version italiana

Modifega

In la version giaponesa l’è stada doppiada de la Fumi Hirano, inveci in Italia voeuna adrée l’altra a inn vegnud vari doppiadrìs:

Accoglienza

Modifega

La Lamù a l’è ‘n personàgg famós e popolár in Giappon, e l’è stada descrivuda come "la tosa di sògn de l’Otaku". El 4 de april del 1982, la Lamù e di alter personàgg de la stòria hinn vegnùu a vóltra in duu avìs de servizzi pùblich per la Kansai Eletric Power Company che diséven de fàgh atenzion ai comètt e ai koinobori apress ai lìni elèttrich[11][12]. Fumi Hirano, la doppiatrìs de la Lamù, l'ha fàa la principal vos foeura de camp principál per i messàgg de reclàmm.

La roba venduda in commèrc con denter la Lamù l'è anmò popolár e la soa imàgin l’è dent in d’on rebelòtt de suppórt stampàa, commerciài e elettrònich[13][14]. Pussée de quattercent ann de l’introduzión del personàgg in del 1978, a hinn ancamò prodòtt i màcchin pachinko con la Lamù[15]. L'organizzadár del Comiket, Koichi Ichikawa, l'ha descrivùu la Lamù sia come origin del moe sia come primm personàgg tsundere, on tipo de carater di vòlt insensìbil e di vòlt amorévol.

L’è quèlla di 42 in la classifica di 50 personàgg femminil pussee amada di giaponés realizzada de Fuji TV, fondada sora i voti de 14.000 spettadór[16].

Second on sondàgg mandad in onda a la television, a considerà i scèrni de 12.000 amiradór giapponés, Lamù l’è la 4ª migliora eroina del period Shōwa (ann 70 e 80), dedree domà al Fujiko Mine, la Minami Asakura e 'l Maetel[17][18][19].

Del 2015 ‘na stàtoa de brónz a grandèzza naturál de la Lamù la fa párt de l'Oizumi Anime Gate, on muséo a la serèna permanént, situàa a l’entràda nord de la stazione di Ōizumi-gakuen, a Nerima (Tokyo)[20][21].

Not

Modifega
  1. ↑ Definizione del termine comprimario. URL consultad in data 26 ottobre 2012.
  2. ↑ F.A.Q.su Lamù. URL consultad in data 17 ottobre 2012. Vedi faq 26
  3. ↑ Varda l'episodi Il triangolo dell'amore (“el triangol de l’amor”)
  4. ↑ Varda l'episodi Rei, el mostro dela cità (“el moster de la cità”)
  5. ↑ eng Transformation of the Oni: From the Frightening and Diabolical to the Cute and Sexy. URL consultad in data 18 gennaio 2021.
  6. ↑ Varda l’episodi Compit in classe
  7. ↑ eng Rumiko Takahashi Interviews: 100 Questions. URL consultad in data 18 gennaio 2021.
  8. ↑ varda l’episodi 42 Salsa piccanta
  9. ↑ (EN) Cast of Characters: Lum. Tomobiki-cho: The Urusei Yatsura Web Site
  10. ↑ ’Sti episodi chì, sibén che a hinn inclus in la primma serie, gh’hann on grupp de doppiador differént
  11. ↑ eng Urusei Yatsura TV Vol. #06 (of 50). URL consultad in data 18 gennaio 2021.
  12. ↑ eng うる星やつら - Urusei Yatsura - Those Obnoxious Aliens. URL consultad in data 18 gennaio 2021.
  13. ↑ eng January Merchandise Releases. URL consultad in data 18 gennaio 2021.
  14. ↑ eng asylum-anime. URL consultad in data 18 gennaio 2021.
  15. ↑ (JA) パチスロ うる星やつら. URL consultad in data 18 gennaio 2021.
  16. ↑ Modell:Cita Web
  17. ↑ I migliori eroi ed eroine degli anime scelti dai fan giapponesi. URL consultad in data 15 agosto 2020.
  18. ↑ Anime: ecco le 5 migliori eroine secondo i giapponesi. URL consultad in data 15 agosto 2020.
  19. ↑ Le eroine più affascinanti degli anime secondo i giapponesi. URL consultad in data 15 agosto 2020.
  20. ↑ (JA) Oizumi Anime Gate. URL consultad in data 15 agosto 2020.
  21. ↑ (EN) Anime characters immortalized in Japan. 9 aprile 2015. URL consultad in data 15 agosto 2020.

Vos correlad

Modifega

Ligamm de foeura

Modifega
Utegnüü da "https://lmo.wikipedia.org/w/index.php?title=Lamù_(personagg)&oldid=1290292"