Noeuv Galles del Sud

Quest articol chì l'è scrivud in lombard, con la Noeuva Ortografia Lombarda

El Noeuv Galles del Sud (in ingles New South Wales, in sigla NSW), a l'è un Stat de l'Australia con capitala Sydney. A l'è el Stat pussee popolos de l'Australia con pussee de 8 milion de persone,^[1] e el quart pusse grand con circa 801.150 km². El se troeuva in de la part sud-orientala del Paes, el confina a sud cont el Victoria, a nord cont el Queensland, a ovest con l'Australia Meridional e a est l'è bagnad de l'ocean Pacifegh (Mar di Corall e Mar de Tasman). El ciapa denter anca l'isola del Lord Howe, in del Pacifegh meridional. Denter del territori a gh'inn do enclav: el Territori de la Capitala Australiana e 'l Territori de la Zoca de Jervis.

Storia Modifega

I prim abitant de l'area inn stad i tribù aborigen che se pensa sien rivade in de la zona in tra i quaranta e i sessanta-mila agn indree. La zona l'è stada esplorada in del 1770 del capitan ingles James Cook, che el da a l'area el nom de incoeu.

La Colonia del Noeuv Galles del Sud l'è stada fondada 'me colonia penal britanega in del 1788; la ciapava denter in origen pussee de metà de la terra-ferma australiana e in del 1825 la gh'haveva 'me confin ocidental el 129º meridian est. La colonia la ciapava denter anca i territori insular de la Noeuva Zelanda, de la Terra del Van Diemen, de l'Isola del Lord Howe e de l'Isola Norfolk. In del secol XIX, part del territori de la colonia l'è stad destacad per fà su colonie britaneghe spartide, che a la fin inn diventade la Noeuva Zelanda e i divers stat e territori de l'Australia.

Geografia fisega Modifega

Cità Modifega

I tre cità principai a inn tute in su la costa:

Sydney: La capitala del Stat del Noeuv Galles del Sud e la pussee popolosa cità de tuta l'Australia e de l'Oceania
Newcastle a Nord de Sydney, a l'è la segonda cità pussee popolosa e capitala industrial de la region Hunter Valley
Wollongong, center industrial de la region de Illawarra a sud de Sydney

Morfologia Modifega

El territori del Noeuv Galles del sud el se po spartì a nivell geografegh in quater bande:

La banda costera, con temperadure che vann de la region temperada del sud a quella sub-tropicala del nord al confin cont el Queensland. Quell'area chì la ciapa denter la zona a sud de Sydney, Illawarra, Shoalhaven, Newcastle, la Central Coast e la North Coast.

A troeuvom l'area di mont de la Great Dividing Range. Tante montagne superen i 1.000 meter de altezza Questpont pussee volt a l'è el Mont Kosciuszko con 2.229 meter. Quell'area chì la ciapa denter el territori di mont del sud, i altipian centrai e la region del New England.