Obiettiv (ottica)
On obiettiv a l'è on strument ottich che'l permett de proiettaa ogni ogett del mond real travers la soa immagin luminosa. Pussee precisament on obiettiv el ciappa su i ragg luminos che i provegnen da on ogett (che'l pò vess on quaicoss de fisegh 'me anca on fotogramm de pellicola) per poeu concentrall sora una superfis de proiezion indoe l'immagin la vegnarà foeura.
I obiettiv poeuden vess fà su cont domà vuna lenta o spegg 'me anca cont ona combinazion de pussee element ottich. I sont drovaa in d'i macchine fotografeghe, telescopi, microscopi, lettor de CD e in tucc i olter strument ottich.
La caratteristega pussee importanta de on obiettiv a l'è la soa lunghezza focal, che l'è la distanza a la quale l'obiettiv el mett a foeugh on pont immaginari mettuu a l'infinii innanz a luu. Questa distanza a l'è espressa in millimeter e a l'è drovaa per indicaa la distanza ottica intra la superfis de proiezion e el center de l'obiettiv. La lunghezza focal, insemma a i dimension de la superfis de proiezion la definiss el angol de camp, che l'è l'ampiezza de l'inquadradura che la pò vess fa da l'obiettiv.