PAN (software)

Quest articol chì l'è scrivuu in lombard, grafia milanesa.

El PAN a l’è on programma professionál de ingegnerìa, in particolar del settór de la tèrmotècnica che ‘l servìss de verificà el ris’c de condensa in su la superfice di mur di edifizzi e denter in di mur medésim e de verificà che la trasmittanza tèrmica del mur la sìa assée second i nòrm tècnich. L’è mandàa foeura de l’ANIT (Associazion Nazionál per l’Isolamént tèrmich e acustich). El pò vèss ùtil semai ch’a se voeura pianificà on intervént de miglioramènt energétich conforma a la nòrma tècnica italiana. I dati pòden vèss salvà denter ind on progètt e dervìi anca cont el programma LETO.

I dati de mètt denter in del programma

-I dati del clima de foeura e de denter. I dati vegnen tràa foeura de quèj prevìst de la normativa, in manera automatica cont el programma medèmm. I dati hinn fornìi mes a mes de manera che i càcol pòden vèss fàa mes a mes inscì de stabilì el mes che e’l ris’c de condensa e muffa l’è pussée grand.

-I strat de che i mur a hinn fàa su e i tipi de ambiént de voeuna e de l’altra part del mur (terrén, ambiént de foeura o de denter, scaldàa o minga scaldàa…).

-I dati tècnich di materiàj de scernì in del programma per fa su la parèd pòden vèss scernìi second la normativa tècnica italiana oppùr vèss miss denter de l’utént medèmm.

De sorapù i struttùr inscì definìi pòden vèss salvàa ind on archivi persént domà in de la macchina doe che s’è ‘drée a lavorà inscì de vèss doperàbil anca col programma LETO.

Analisi di struttur

El programma PAN, degià che ‘l gh’hà denter i proprietà di materiàj (contegnùu de acqua e conduttività tèrmica) cont el varià de l’umidità e de la temperadura el permètt de calcolà la conduttività tèrmica d'on materiàl in fonzión di condizión de temperadura e umidità de progètt. La conduttività tèrmica inscì calcolada la sarà poeu quèlla de progètt. Cont el varià i dati de la paréd, in manera automàtica el ven calcolàa el dato de la trasmittanza tèrmica de tutta la parèd e di àlter valór catàtteristich (sfasadura de l’onda tèrmica, indebolimént de l’onda tèrmica infra el defoeura e 'l dedenter, capacità tèrmica) ‘Na verìfica importanta l’è ancasì quèlla del ris’c de la muffa, el programma el fa el contròll de la situazión mes a mes e ‘l fornìss anca el valór de la resistenza tèrmica minima che gh’è besògn de evità la muffa A l’istèssa manera el ven verificàa el ris’c de la condensa denter in del mur. De sora maròss el programma l’è bon de fa la verifica ora per ora anca cont el considerà el varià de la radiazión solár e ’l coefficent de assorbimént de la superfice. Qualora che se faga la condensa el programma l’è anca bon de calcolà el temp che ghe voeur al mur de sugàss.

A la fin del la fera a hinn disponìbil anca di verìfich per l’estàa o ben el trovà foeura qual che l’è el contègn tèrmich de mur d’estàa in conseguenza di variazión periòdich giornaliér de la radiazión solár. El mur el detèrmina on indebolimént e 'na sfasadura de l’onda tèrmica che la se propraga del de foeura al de denter e quèst el ven simulà del programma PAN, inscì de conóss ora per ora la temperadura in su la faccia intèrna del mur e donca fluss tèrmich vèrs l'ambiént de denter. Tucc i verìfich ch’hinn stàa fàa pòden vèss miss giò in d'ona relazión missa giò del programma medésim de manera automatica.

Vos correlad

• Diagramma del Glaser
• Umidità
• LETO
• ANIT