Lumbard ucidental Quest articol chì l'è scrivuu in lombard, grafia milanesa.


El pont termich a l’è la zòna locál limitada de la scòrza de l'edifizzi indoe gh’è ona densità de fluss tèrmich maggióra rispètt ai element arént de la costruzión.

Classificazion Modifega

 
Andana di isotèrmi in corrispondenza d’on spìgol

I pont tèrmich pòden vèss classificàa per:

  1. Càosa
    1. irregolarità geometrica
      1. differenza intra l'àrea de la superficie disperdenta del fianch de denter e quèlla del fianch de foeura, compàgn che ‘l succéd per esempi in corrispondenza de la giontadura infra la paréd e ‘l pavimént o infra la paréd e ‘l plafón (a hinn i spìgoj estèrni de l’edifizzi e cambién in fonzión de la geometria de l’àngol). Di esempi clàssich hinn i spìgol (per esempi i collegamént infra 'na parèd e 'n’altra, tra ‘na paréd e ‘l sorée o la connessión infra i paréd e i saramènt eccètera) in corrispondenza di quàj la superfice disperdenta l’è pussée e i superfici isotèrmi, perpendicolár al fluss tèrmich, se piéghen.
      2. variazión del spessór de la costruzión (cavedi, nicc, locàj tècnich, camìn)
    2. irregolarità quant a la materia: descontinuità de resistenza tèrmica che la pò capità in corrispondenza de la pentrazión totál o parziál di materiàj de la scòrza edilizia de conduttività tèrmica divèrsa (pilàster, divisòri, trav e bòrd, ciòd per taccàa su el paltò tèrmich de foeura, elemént de collegament di poggioeu, costruzión in su l’ùltimm piàn, attacch per i tend, cornisón, teccér-mènsol)
  2. Tipi
    1. lineàr: bòrd, trav, aggètt, pilàster (in verticàl), marciapée, scòss passànt, slontanadór di invedriàd.
    2. pontuàj: pilàster (attàcch a pavimént e a soffìtt), ciòd per el paltò tèrmich, trav a sbalz, attàcch di costruzión de foeura sora l’ùltim piàn.

I effètt Modifega

I pont tèrmich gh’hànn ‘n impàtt sora chì aspètt chì:

  1. Aspètt igienico-sanitari: formazión possìbil de muffa per via de la condensa superficiál;
  2. Aspètt strutturàj: di variazión de la temperadura in di struttùr pòden caosà di tensión e di fenòmen de condensa in superfice con la formazión de la muffa e de la condensa denter in del mur che ménen a 'n peggioramént di caratterìstich e de la soa durada.
  3. Aspètti del cònfort: riduzión del cònfort tèrmich intèrno caosàa de la diversità de la temperadura di superfici che gh’è intorna rispètt a l’aria
  4. Aspètt relatìv a l’energìa: aumént di consùmm de energìa caosàa d’on aumént di pèrdit per trasmissión che pòden rivà fin anca al 20-30% di dispersión totàj de l’edifizzi.
Descrizion de la struttura Cressimént, in percentuàl, relatìv a la presenza di pont tèrmich
Mur con isolamént de foeura (a paltò) senza aggètt/poggioeu e pónt tèrmich correggiùu 5%
Mur con isolamént de foeura (a paltò) con aggètt/poggioeu 15%
Mur omogéni de quadrèj pién o de prèia (senza isolànt) 5%
Mur a cassa voeuja con quadrèj voeud (senza isolánt) 10%
Mur a cassa voeuja con isolamént in del spazzi de mèzz (pont tèrmich correggiùu) 10%
Mur a cassa voeuja con isolamént in del spazzi de mèzz (pont tèrmich minga correggiùu) 20%
Pannèll fabricàa prima de cimént cont on pannèll isolánt de denter 30%

Manera de calcolaj Modifega

I métod principàj de calcolà i pont tèrmich miss in órdin a segonda del grad de precisión hinn:

  1. càlcol a forfè: percentuàl de cressimént di dispersión; mètod che ‘l ghe pò vèss aplicàa ai edifizzi giamò esistént, in assenza de dati de progètt attendìbil o comunque de informazión pussée precìs, per on quàj tipo de edifizzi. El scambi tèrmich el pò vèss determinàa a forfè conforma a quant l’è raportàa ind la nòrma UNI/TS 11300-1 11.1.3 prospètt 4
  2. àbacch di pont tèrmich: UNI EN ISO 14683
  3. càlcol del fluss tèrmich in dò e trèe dimensión: EN ISO 10211:2008
  4. métod de analisi dinamica

Condizion del modèll de la struttura edilizia Modifega

La UNI EN ISO 10211:2008 la definìss i caratteristich di modèj de geometrìa 3-D e 2-D de on pont tèrmich, al fin del càlcol numérich de:

  1. el fluss tèrmich, per determinà i dispersión de calór totàj d’on edifizzi o de ‘na soa part;
  2. i temperadùr mìnim superficiàj, al fin de stimà el ris’c de condensa superficiál. Ind la nòrma gh'è denter i lìmit del modèll geomètrich e i sò suddivisión, i condizión lìmit e i valór de temperadura associàa de doperà.
  3. la grandèzza del gropp: o ben distanza minima del pont tèrmich che la gh'hà de vèss al fin che i lìnej de fluss tèrmich sìen nò piegàd: 1m oppùr trèe vòlt el spessór de l'elemént
  4. el piàn de taj:
    1. Condizion de assenza de scambi de calór (el vèss adiabàtegh) del piàn de taj (i isotèrmi hinn parallél in corrispondenza del pián)
    2. Posizion del piàn de taj in corrispondenza d’on piàn de simitria se cheeschì l’è a distanza minora de 1 m rispètt a l’elemént centrál.
  5. el fluss de calִór: a se dopera in del càlcol la temperadura estèrna media del mes pussée bassa (per Trieste 4,9°C a genàr conforma a la UNI 10349). Se ’l sìt el fudèss nò prevedùu de la nòrma a l'è necessari calcolál per mèzz d'ona fórmola contegnuda ind la nòrma UNI 10349 el valór de temperadura media giornadera de l'aria defoeura.
  6. i temperadur
  7. la resistenza tèrmica superficiàl

Programma informatìch Modifega

Manuaj Modifega

Limit Modifega

  • Pont tèrmich correggiùu: Conforma a l'art. 26 del D.Lgs. n. 311/2006, a on pont tèrmich a ghe dìsen che l'è correggiùu quand che la trasmittanza tèrmica del mur immaginari (el tratt de paréd estèrna in corrispondenza del pont tèrmich) l’è minga pussèe granda del 115% de la trasmittanza tèrmica del mur
  • Pont tèrmich assént: Second el stàndard Casa passiva, on edifizzi el pò vess consideràa priv de pont tèrmich se ‘l fluss tèrmich l’è inferiór de 0,01 W/mK
  • Réglementation thermique 2012: Conforma a la normativa francesa i pont tèrmich gh’hànn de vègh 'na trasmittanza inferiora de 0,6 W/K

Soluzion Modifega

La scòrza edilizia la gh’hà de sicurà la continuità del strat de isolamént al fin de limità la presenza di pont tèrmich. I soluzión i pòden vèss:

  1. preventiv
  2. de correzión

Infra i soluzión gh'è denter:

  • l'isolament a paltò contìnov
  • i tassej insolàa per el paltò tèrmich estèrno
  • i poggioeu
    • poggioeu con isolamént in su ‘n fianch
    • poggioeu con paltò
    • poggioeu con descobbiamént tèrmich
    • el trà giò e fa su de noeuv di poggioeu che se sostegnen in deperlór (tipo palàd) conligàa a l'edifizz per mèzz de tassèj.
  • la stabilidura antimuffa
  • In di sarament
    • la canalina o i slontanadór isolánt
    • el veder doppi incassàa in del telar

Càlcol del risparmi energetich Modifega

Càlcol semplificàa del risparmi econòmich a l’ann pervedùu cont on intervént de miglioramént energètich de correzión d’on pont tèrmich.

€ = (∆Qh x d x GR)/1000 * P

indoe:

  • ∆Qh = ∆psi x ∆T x L [W]
  • ∆T = (GG/GR) x R x f
  • GG: gradi dì del sit consideràa
  • d: Tutt el temp de fonzionamént de l’impiánt de riscaldamènt in or
  • GR: Tutt el temp in , de la stagión de riscaldamènt
  • R: fattór de correzión che ‘l ten in cunt l’esposizión de l’ambiènt
  • f: fattór che ‘l considera l'efficienza de l'impiànt. Per i abitazión 0,9
  • ∆psi: differenza de fluss tèrmich travèrs i pont tèrmich in W/mK
  • L: longhèzza del pont tèrmich
  • P: prèzzi unitari de l'energìa in €/kWh
sigla valór
d 24
GG 2345
GR 183
R 1
f 0,9
f 0,9
∆psi 0,6 - 0,1 = 0,5
L 8 finèster x (base 0,9 x altèzza 1,5) = 38,4 m
P 0,085 €/kWh

Risparmi = ((0,5 W/mK x (2345 K / 183 gg x 1 x 0,9) x 38,4m) x 24 x 183)/1000 x 0,085 €/kWh = 82 €/ann

Banca dati di manér de costruì Modifega

  • Bouw-energie. URL consultad in data 5 aprile 2013(arqiviad de l'url orijenal in data 20 marzo 2013)

Normativa de riferiment Modifega

  • Normativa italiana: per via de la Leg n. 10 del 1991 a s’è taccàa a fàgh l’isolament tèrmich ai edifizzi de manera manemàn pussée seria ma semper assosènn distanta de la necessità reál de ridù i stralattamént de l'energìa; fin tant che l’è minga intervegnuda l'Europa, cont i sò nòrm, a vosàgh adrée ai Paesi member per el rispètt di règol rìgid decidùd insèma. L'Italia la s’è adattada in del 2005, cont el mandà foeura el D. Lgs. n. 192, che el gh’ha impòst di lìmit sevér ai consùmm e ai emissión de anidride carbonica in atmosfera. In del perìod infra el 1991 (L. n. 10) al 2005 (D. Lgs. n. 192) i pont tèrmich hinn stàa in realtà assosènn trascuràa tant ind la fase de progettazión quant in quèlla de costruzión inscì de fa formà despèss la muffa in corrispondenza di part pussée crìtich de irregolarità de l’isolamént . In del 2011 i pont tèrmich hinn assèe vardàa adrée, soratùtt per via de la tendenza a costruì di edifizzi a bass consùmm, e 'l trà via i pont tèrmich a l'è on elemén decisìv al fin del risparmi energètich, degià che,de là di i muff, i pont tèrmich i detèrminen di dispersión de calór maggiór e donca di consùmm pussée elevàa, cont on peggioramént de la class energetica de l’edifizzi. La diffusión di sistèma de regolazión del clima intèrno d’estaa, ancasì la gh’hà besògn de strategìj de migliorà l’isolamént tèrmich anca d’estàa per andagh contra ai picch de domanda de energia elèttrica che sconvòlgen i bilànc di edifizzi. On'isolamént tèrmich òttim, che ‘l voeur dì anca el trà foeura i pont tèrmich, l’è capàzz minga domà de dagh contra ai bass temperadùr de l’invèrna ma anca per difendess del cald de l’estàa. A gh’è anca besògn de marcà su che i progettista i gh’hànn el dovér de avègh cura de l’ambiént cont el ridù i emissión in atmosfera e andàndogh adrée a la qualità e a la sostenibiltà, e mindomà a la composizión architettònica tal e nient’alter. Ancabén cont el rispettà i tradizión de costruzión di vari región climàtich, menàd innánz in sècoj de esperienza, sa gh'è besògn de ottegnì el cònfort e ’l benèssen senza per fòrza restàa ancoràa a di soluzión stàtich oramai andeghér e minga adàtt.
  • UNI EN ISO 10211-1:1998 Ponti tèrmich in edilizia - Càlcol di fluss tèrmich e di temperadùr superficiàj - Parte 1: Metod generàj.
  • EC 1-2007 UNI EN ISO 10211-1:1998 Pont tèrmici in edilizia - Càlcol di flussi tèrmich e di temperadùr superficiàj - Parte 1: Métod generàj.
  • UNI EN ISO 10211-2:2003 Pont tèrmich in edilizia - Càlcol di fluss tèrmich e di temperadùr superficiàj - Pont tèrmich lineár
  • UNI EN ISO 14683:2001 Pont tèrmich in edilizia - Coefficént de trasmissión tèrmica lineár - Métod semplificàa e valór de riferimént
  • UNI EN ISO 14683:2008 Pont tèrmich in edilizia - Coefficént de trasmissión tèrmica lineár - Métod semplificàa e valór de riferimént

Bibliografia Modifega

Vos correlad Modifega


Ligamm de foeura Modifega