Poscena di donn

Quest articol chì l'è scrivuu in lombard, grafia milanesa.

La Poscena di donn (del latin post cœnam) l'era ona festa tradizzional varesotta, che troeuvom, per esempi, a Vares e a Casoraa.
La se inseriva in di vari tradizzion lombard per la fin de genar, e l'era dedicada ai donn. La se festeggiava l'ultem giovedì del mes de genar, tant 'me la Giubiana o Gioeubia (festa a la qual la se colega): in sostanza, i donn se trovaven insemma in de la cusina de vuna de lor per fàss ona festoeula in tra de lor, cont el mangià quaicoss de pussee bon de la solita menestra: per esempi del salamm, o 'n tocch de formagg, cont on bicerin de vin. La poscena la finiva cont on quai scherz e ona cantada.
On temp l'esisteva anca la poscena di omen, che, inscambi, la se faseva el terz giovedì de genar. La poscena di omen l'è descomparida ancamò prima de quella di donn.

'Sti inconter invernai in tra i donn eren on quaicoss de ben spantegaa in tutt el territori de coltura lombarda: per esempi in del Canton Tesin i donn se trovava per filà insema in di sirad de inverna, per poeu giugà e cantà insemma.

Bibliografia

• Natale Gorrini, Clemente Maggiora, I nost paroll. Parolario bosino, Vares, Famiglia Bosina, 2003.

Varda anca

• Cantà sgenee
• Giubiana
• Filera